სურსათის ეროვნული სააგენტოს წარმომადგენლები იმერეთში ჩავიდნენ და ადგილობრივ მოსახლეობას რუსეთში მწვანილის ექსპორტთან დაკავშირებული პროცედურები გააცნეს. მათ მწვანილის ექსპორტით დაინტერესებულ პირებთან ერთად წყალტუბოს რაიონში დაათვალიერეს სათბურები და სასაწყობე-სამაცივრე მეურნეობები, სადაც ხდება ტვირთის საექსპორტო პარტიების ფორმირება.
როგორც “თბილისი თაიმსს” ეროვნული სააგენტოდან აცნობეს, სათბურებში, სადაც მონიტორინგი პერმანენტულად ტარდება, განმეორებით განთავსდა სპეციალური სქესმჭერები, რომელიც აფიქსირებს საკარანტინო მავნებელს. ფიტოსანიტარების მიერ სიტუაციის დამატებითი შესწავლის შემდეგ აღნიშნულ სათბურებში საკარანტინო მავნებელი არ გამოვლინდა, ვითარება დამაკმაყოფილებელია და ტერიტორია საკარანტინო მავნე ორგანიზმებისაგან თავისუფალ ზონად გამოცხადდა, რაც იმას ნიშნავს, რომ იმერეთის რეგიონი მზად არის რუსი სპეციალისტების მისაღებად და საერთაშორისო პრაქტიკით გათვალისწინებული ერთობლივი ინსპექტირების განსახორციელებლად.
სურსათის ეროვნული სააგენტოს წარმომადგენლებმა იმერეთის რეგიონულ სამსახურს დამატებით გადასცეს ის ტექნიკური აღჭურვილობა, რაც საჭიროა ფიტოსანიტარიული სერტიფიცირების პროცესისათვის. საექსპორტო პროდუქციას, მათ შორის მწვანილს დაათვალიერებენ მიკროსკოპი “ბინოკულარით”, რომლითაც უკვე აღიჭურვა სააგენტოს ადგილობრივი სამსახური და ისინი “როსსელხოზნადზორის” წარმომადგენლებთან ერთად ჩაატარებენ ერთობლივ ფიტოსანიტარიულ პროცედურებს.
