მიხეილ ჯავახიშვილის ქუჩაზე სარეაბილიტაციო სამუშაოები თებერვლის ბოლოს დასრულდება და მოძრაობა სრულად აღდგება. ამის შესახებ თბილისის მერიის კეთილმოწყობის საქალაქო სამსახურის უფროსმა ავთანდილ სუდაძემ განაცხადა, რომელიც სარეაბილიტაციო სამუშაოების მიმდინარეობას დღეს ადგილზე გაეცნო.
ავთანდილ სუდაძის თქმით, დედაქალაქის მერიამ უმოკლეს ვადაში დაასრულა სამუშაოების პირველი ეტაპი – კედლის გამაგრების სამუშაოები და ხიმინჯების მოწყობა.
„რამდენიმე დღეში მთლიანად დასრულდება კედლის გამაგრების სამუშაოები. პარალელურად, სერვისის მომწოდებელი ყველა კომპანია დაიწყებს ქსელების მოწესრიგებას, რის შემდეგაც დაიწყება გზის საფარის აღდგენითი სამუშაოები, მოეწყობა ქვაფენილი. სამუშაოები თვის ბოლოს დასრულდებადა მთლიანად აღდგება მოძრაობა“ – განაცხადა ავთანდილ სუდაძემ.
კომპანია “GWP”-ის ტექნიკური დირექტორის მოადგილის ომარ გოცირიძის თქმით, დღეიდან იწყება წყალსადენის ძირითადი ქსელის შეცვლა-განახლება. მისივე თქმით, მთლიანობაში შეიცვლება 700 მეტრის სიგრძის ქსელი, განახლდება კანალიზაციის ქსელიც.
მ. ჯავახიშვილის ქუჩაზე საყრდენი კედელი 12 იანვარს ჩამოიშალა. სარეაბილიტაციო სამუშაოებს 24 საათის განმავლობაში „კავკასუს როუდ პროჯექტი“ აწარმოებს.
