შემოსავლების სამსახურის უფროსის ლაშა ხუციშვილის 2015 წლის 11 თებერვლის N3520 ბრძანებით დამტკიცდა ,,საგადასახადო ვალდებულებების ნებაყოფლობითი შესრულების სტრატეგია“. შემოსავლების სამსახურის ინფორმაციით, სტრატეგიაში დეტალურად არის აღწერილი შემოსავლების სამსახურის მიერ განხორციელებული პროექტები და მიღწევები, საგადასახადო შემოსავლების როლი ქვეყნის ეკონომიკაში და გადამხდელთა ის მიზნობრივი ჯგუფები, რომელთა გადასახადების ნებაყოფლობითი დეკლარირების და გადახდევინების გაუმჯობესება აქტუალური და მნიშვნელოვანი იქნება 2015 – 2016 წლებში. შემოსავლების სამსახურის მთავარი მიზანია გადამხდელების ხელშეწყობა სხვადასხვა საკითხის მოგვარებაში, სამართლიანი, მარტივი და სანდო საგადასახადო სისტემის ჩამოყალიბება. სტრატეგიის ფარგლებში შემოსავლების სამსახური ყურადღებას უთმობს ისეთ სფეროებს, როგორებიცაა: მშენებლობა, საზოგადოებრივი კვების ობიექტები, ავტონაწილებით მოვაჭრეები და ფიზიკური პირები. შემოსავლების სამსახური ,,საგადასახადო ვალდებულებების ნებაყოფლობითი შესრულების სტრატეგიის“ სახელმძღვანელოს გამოცემას ყოველწლიურად გეგმავს.
