სპორტისა და ახალგაზრდობის საქმეთა სამინისტროს საკონფერენციო დარბაზში დღეს, სსიპ ბავშვთა და ახალგაზრდობის განვითარების ფონდის 2015 წლის პირველი საგრანტო კონკურსი გამოცხადდა.
როგორც “თბილისი თაიმსს” სამინისტროდან აცნობეს, საგრანტო კონკურსის შესახებ ინფორმაცია დაინტერესებულ საზოგადოებას სპორტისა და ახალგაზრდობის საქმეთა მინისტრმა ლევან ყიფიანი, მინისტრის მოადგილე აკაკი ლოდიამ და სსიპ ბავშვთა და ახალგაზრდობის განვითარების ფონდის დირექტორმა ირაკლი ჟორჟოლიანმა გააცნეს.
უწყებაში განმარტავენ, რომ ბავშვთა და ახალგაზრდობის განვითარების ფონდი ერთადერთი სახელმწიფო დაწესებულებაა, რომლის მთავარი მიზანია საგრანტო კონკურსების ფარგლებში დააფინანსოს ახალგაზრდული იდეები, ახალგაზრდული არასამთავრობო ორგანიზაციები და ხელი შეუწყოს სხვადასხვა სფეროს განვითარებას, ახალგაზრდების დასაქმებას, ახალგაზრდული სამოქალაქო სექტორის გაძლიერებას.
“გასული წლების განმავლობაში, რეგიონული კამპანიების ფარგლებში ფონდის ადმინისტრაცია შეხვდა ასობით ახალგაზრდას საქართველოს ყველა მუნიციპალიტეტში. ჩატარდა მოკვლევა თუ რა თემები აინტერესებთ ახალგაზრდებს, რა არის მათი ძირითადი პრობლემები, რა საკითხზე ისურვებდნენ მუშაობას და ა.შ. მიღებული გამოცდილებიდან, გამოკვეთილი აქტუალური საკითხებიდან და რაც მთავარია, სახელმწიფო ახალგაზრდული პოლიტიკის სტრატეგიული საკითხებიდან გამომდინარე 2015 წელს სწორედ ამ პრიორიტეტების ფარგლებში გამოცხადდება ფონდის საგრანტო კონკურსი და ახალგაზრდული პროექტები მიიღება შემდეგი მიმართულებით: დასაქმების ხელშეწყობა და არაფორმალური განათლება; ცხოვრების ჯანსაღი წესი და მასობრივი სპორტი; სამოქალაქო ჩართულობა; ინოვაციების ხელშეწყობა”, – აცხადებენ სამინისტროში.
მათივე ინფორმაციით, პროექტები მიიღება ელექტრონულად, გამარტივებული სააპლიკაციო ფორმის მეშვეობით, რომლის შევსება ორგანიზაციას ფონდის ვებ-გვერდზე რეგისტრაციის შემდეგ შეეძლება. სარეგისტრაციო და სააპლიკაციო ფორმა ავტომატურად ჩაირთვება 2 მარტის 10:00 საათიდან; კონკურსის მიმდინარეობის პროცესში გაიმართება საკონსულტაციო საათები; აპლიკაციის გზამკვლევის თუ სხვა ტექნიკური დეტალების შესახებ ინფორმაციის მიღება შესაძლებელი იქნება ფონდის ვებგვერდიდან: fondi.gov.ge.
უწყების ცნობით, მიმდინარე წელს ფონდი კიდევ ერთ საგრანტო კონკურსს გამოაცხადებს. ფონდის წლიური ბიუჯეტი 1 300 000 ლარია.
აღნიშნული ფონდის მიერ 2013-2014 წლებში 116 პროექტი დაფინანსდა. საქართველოს ყველა რეგიონიდან დასაქმდა 700 ახალგაზრდა, სულ პროექტებში ჩართული იყო 20 000-ზე მეტი ბენეფიციარი.
Discussion about this post