ჩვენი ქვეყნის, ჩვენი მთავრობის მიმართ არსებობს ნდობა, – ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის დღევანდელ სხდომაზე განაცხადა.
პრემიერმა საქართველოში უცხოური ინვესტიციების მოცულობის გაზრდის თაობაზე სტატისტიკის ეროვნული სამსახურის მიერ გამოქვეყნებული მონაცემები შეაფასა და აღნიშნა, რომ არსებული მაჩვენებლები სწორედ მთავრობისადმი ინვესტორთა ნდობაზე მიუთითებს.
“მინდა, გამოვეხმაურო იმ სტატისტიკურ ინფორმაციას, რაც გუშინ გამოქვეყნდა. საქართველოში 2014 წელს, 2013 წელთან შედარებით, პირდაპირი უცხოურო ინვესტიციების მოცულობა გაიზარდა. ეს გახლავთ სტატისტიკის ეროვნული სამსახურის წინასწარი მონაცემები. ეს იძლევა ოპტიმიზმის საფუძველს, მით უმეტეს, თუ გავითვალისწინებთ რეგიონში არსებულ ურთულეს პოლიტიკურ და ეკონომიკურ ვითარებას, რაც პრაქტიკულად შეეხო ყველას. სწორედ ამ ფონზეა განსაკუთრებით აღსანიშნავი ინვესტიციების შემოსვლის ზრდის ტენდენცია. ეს ნიშნავს, რომ არსებობს ნდობა ჩვენი ქვეყნის მიმართ, ჩვენი მთავრობის მიმართ. პირდაპირი უცხოური ინვესტიციების მოცულობამ 2014 წელს მილიარდ 272 მლნ აშშ დოლარი შეადგინა, რაც 39 პროცენტით აღემატება 2013 წლის წინასწარ მონაცემებს და 35 პროცენტით დაზუსტებულ მონაცემებს. ამავე პერიოდში რეინვესტიციის ოდენობამ მთლიანი პირდაპირი უცხოური ინვესტიციების 21 პროცენტი შეადგინა”-აღნიშნა პრემიერმა.
მანვე დაასახელა იირდაპირი ინვესტორი ქვეყნები – ნიდერლანდები, რომლის ინვესტიციის რაოდენობამ შეადგინა 331 მლნ აშშ დოლარი, აზერბაიჯანი – 302 მლნ დოლარი, ჩინეთი – 195 მილიონი, დიდი ბრიტანეთის გაერთიანებული სამეფო – 114 მილიონი, ლუქსემბურგი – 85 მლნ, აშშ – 80 მლნ, თურქეთი – 67 მლნ, რუსეთი – 66 მლნ, დანარჩენ ქვეყნებზე მოდის 32 მლნ აშშ დოლარი.
ირაკლი ღარიბაშვილის თქმით, გამოიკვეთა სამი უმსხვილესი სექტორი, რომელთა წილმა 2014 წელს 64 პროცენტი შეადგინა. ყველაზე მეტი პირდაპირი უცხოური ინვესტიცია ტრანსპორტსა და კავშირგაბმულობაში განხორციელდა და 343 მლნ აშშ დოლარი შეადგინა, რაც მთლიანი პირდაპირი უცხოური ინვესტიციების 27 პროცენტია. მეორე ადგილზეა მშენებლობა 295 მლნ აშშ დოლარით, ხოლო მესამეზე – გადამმუშავებელი მრეწველობა 174 მლნ აშშ დოლარით. ასევე წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2014 წლის IV კვარტალში 349 მლნ აშშ დოლარი შეადგინა, რაც 2013 წლის IV კვარტალის წინასწარ მონაცემებს 61 პროცენტით, ხოლო ამავე პერიოდის დაზუსტებულ მონაცემებს 54 პროცენტით აღემატება. ამ პერიოდში ყველაზე მეტი ინვესტიცია განახორციელეს აზერბაიჯანმა (84 მლნ აშშ დოლარი), ნიდერლანდებმა (67 მლნ) და დიდმა ბრიტანეთმა (66 მლნ).
ირაკლი ღარიბაშვილის თქმით, მთავრობა ყველაფერს აკეთებს, რომ ქვეყანა გაუმკლავდეს პრობლემებს, რომლებიც არსებობს არა მარტო საქართველოში, არამედ მთელ რეგიონში.
