„თავისუფალი დემოკრატების“ „ნაციონალური მოძრაობის“ ინიციატივას, მთავრობის იმპიჩმენტის დასაწყებად ხელმოწერების შეგროვების შესახებ, მხარს არ უჭერს. როგორც პარტიის ლიდერი ირაკლი ალასანია აცხადებს, მალე პარტია, ეკონომიკური განვითარების გეგმის პარლამენტში წარდგენას გეგმავს.
„ივანიშვილს და სააკაშვილს ერთმანეთი სჭირდებათ, რომ ხალხი დააშინონ ერთმანეთით. ამიტომ, თამამად შემიძლია ვთქვა, რომ საქართველოს და ჩვენს მომავალს არცერთი არ სჭირდება. საქართველოს სჭირდება განვითარება, საქართველოს არ სჭირდება დაბრუნება სააკაშვილის წარსულში. რაც მთავარია, იქ მისული ხალხი, რომელიც გამოვიდა რამდენიმე დღის წინ, ძირითადად გამოხატავს იმ სულისკვეთებას, რომელიც მთელ საქართველოშია – რომ უმოქმედობამ საქართველო დახია უკან.
აქედან გამომდინარე, „თავისუფალი დემოკრატები“ ვიმოქმედებთ ზუსტად ისე, როგორც ეს სჭირდება ხალხს და ჩვენს ქვეყანას და წავიყვანთ ქვეყანას წინ. ძალიან მალე, ჩვენ გვექნება ჩვენი ეკონომიკური განვითარების გეგმის პრეზენტაცია და ასევე, ამასთან შესაბამისად, ჩვენი დღის წესრიგით შევალთ პარლამენტში. ამ კონკრეტულ შემთხვევაში, მათ ინიციატივას, მხარს არ დავუჭერთ“, – განაცხადა ალასანიამ.
