ჟურნალისტებს მთავრობის დღევანდელი სხდომის დაწყებამდე სოფლის მეურნეობის მინისტრმა ოთარ დანელიამ განუცხადა, რომ სახელმწიფოს მიერ დაფინანსებული საწარმოები, ბუნებრივია, არ გახლავთ ქარხნები, საიდანაც ორთქლი ამოდის, მისივე განმარტებით, ტერმინი “დაფინანსება” არასწორად არის გაგებული.
“ჩვენ, ბუნებრივია, არ გვაქვს იმის ფუფუნება, რომ მინიმალური ზღვარი დავაწესოთ რამდენი ადამიანი უნდა დაასაქმოს ახალმა საწარმომ – თითოეული ადამიანის დასაქმება არის უმნიშვნელოვანესი. ძალიან მნიშვნელოვანია გესმოდეს, რას ნიშნავს ტერმინი ”დაფინანსება”. ”დაფინანსება” ნიშნავს, რომ 105 მოთხოვნა საწარმოს, ან ახალი ბიზნესის წამოწყებაზე დაკმაყოფილდა და დახმარების პროცედურები ან დაწყებულია, ან უკვე განხორციელებული. შესაბამისად, ან უკვე აშენებულია საწარმო, ან მუშა მდგომარეობაშია, ან მიმდინარეობს მშენებლობა ან დაწყებულია მოსამზადებელი სამუშაოები. მიმდინარეობს მონიტორინგი და ვნახავთ, რამდენმა დააკმაყოფილა პირობები. ბუნებრივია, ეს არ გახლავთ ქარხანა, საიდანაც ამოდის ორთქლი. ეს გახლავთ ნებისმიერი ბიზნესი, რომელმაც შეიძლება დარგს მისცეს სტიმული, ბიძგი და წაახალისოს. ამიტომ, ეს იქნება ფერმა, სათბური, გადამამუშავებელი საწარმო თუ ნებისმიერი სხვა, რა თქმა უნდა, ჩვენთვის ძალიან მნიშვნელოვანია და წარმოადგენს ახალ საწარმოს”, – განაცხადა ოთარ დანელიამ
ასევე სოფლის მეურნეობის მინისტრმა ახალი საწაწრმოს გახსნაც დაანონსა, რომელიც ხვალ ქალაქ ხობში გაიხსნება.
ოთარ დანელიამ მედია ახალი საწარმოს გახსნაზე მიიწვია.
“ყველას გეპატიჟებით ხვალ სამეგრელოში, სადაც ჩვენ ახალ საწარმოს გავხსნით. თხილის გადამუშავება სამეგრელოში ერთ-ერთი ყველაზე მნიშვნელოვანი მიმართულებაა და ეს გახლავთ ამ პროფილის საწარმო”, – აღნიშნა ოთარ დანელიამ.
ხობში საწარმოს გახსნას პრემირი ღარიბაშვილიც დაესწრება.
ნინა პირტახია
