იუსტიციის სახლში სისხლის სამართლის რეფორმის უწყებათაშორისი საკოორდინაციო საბჭოს სამუშაო სხდომა გაიმართა. სხდომას სისხლის სამართლის სისტემის რეფორმის უწყებათაშორისი საკოორდინაციო საბჭოს წევრების გარდა საქართველოს აღმასრულებელი, საკანონმდებლო და სასამართლო ხელისუფლების, არასამთავრობო ორგანიზაციების, ადგილობრივი და საერთაშორისო დონორი ორგანიზაციების წარმომადგენლები ესწრებოდნენ.
როგორც “თბილისი თაიმსს” სამინისტროდან აცნობეს, სხდომაზე განიხილეს იუსტიციის სამინისტროს მიერ მომზადებული შედარებით-სამართლებრივი კვლევა „პროკურატურის ადგილი სახელმწიფო სისტემაში“, რომელიც პროკურატურის როლს და მთავარი პროკურორის დანიშვნა-გათავისუფლების ახალ მექანიზმს ითვალისწინებს. საქართველოს კონსტიტუციის თანახმად, პროკურატურა იუსტიციის სამინისტროს სისტემაშია და მას იუსტიციის მინისტრი ხელმძღვანელობს. პროკურატურის ამ როლის გადახედვა საჭიროებს საკონსტიტუციო ცვლილებას, რაც ამ ეტაპზე ვერ ხერხდება, ამდენად სისხლის სამართლის უწყებათაშორისმა საბჭომ დღეს განიხილა რეფორმის ერთ-ერთი ვარიანტი, რომელიც არ მოითხოვს საკონსტიტუციო ცვლილებებს და პროკურატურის ეფექტიანად და სწრაფად, წელსვე რეფორმირებას ითვალისწინებს. სამუშაო მოდელის თანახმად, პროკურატურის საერთო ხელმძღვანელობას იუსტიციის მინისტრი საპროკურორო საბჭოს მეშვეობით განახორციელებს, მთავარი პროკურორის დანიშვნის უფლებამოსილება კი გადანაწილდება საპროკურორო საბჭოზე, მთავრობასა და პარლამენტზე. სამუშაო ვერსიის თანახმად, საპროკურორო საბჭოს შემადგენლობაში შევლენ: იუსტიციის მინისტრი − საპროკურორო საბჭოს თავმჯდომარე; მთავარი პროკურორის მოადგილე, პარლამენტის ადამიანის უფლებათა და იურიდიულ საკითხთა კომიტეტის თავმჯდომარეები; წევრი, რომელსაც პარლამენტი აირჩევს აკადემიური წრეებისა და არასამთავრობო ორგანიზაციების წარდგენილი კანდიდატებიდან და 3 პროკურორი, რომელსაც საქართველოს პროკურორთა კონფერენცია დაასახელებს. საბჭოს წევრთა უფლებამოსილების ვადა 4 წლით განისაზღვრება.
