სიმართლეს ქართული საზოგადოება მალე გაიგებს და მოსთხოვს ღარიბაშვილს და ბიძინა ივანიშვილს პასუხს, – ამის შესახებ “თავისუფალი დემოკარტების” ლიდერმა, თავდაცვის ყოფილმა მინისტრმა, ირაკლი ალასანიამ ჟურნალისტებთან ქუთაისში განაცხადა.ალასანიას თქმით, ღარიბაშვილმა “კაბელების საქმეზე” ხუთი უდანაშაულო ადამიანი ჩასვა ციხეში და ქართული საზოგადოება ამასთან დაკავშირებით მალე სიმართლეს გაიგებს.
“მე მინდა, შევეხო იმ საუბარს, რომელიც ახსენა ღარიბაშვილმა – ეს საუბარი შედგა, როდესაც მივიღე უტყუარი მონაცემები იმის შესახებ, რომ მისი ახლობელი იყო ჩართული “დელტაკომის” მხარეს ამ საქმის პოლიტიზირებაში და მეორე – როდესაც უტყუარი ინფორმაცია შევიტყვე, რომ იმ პერიოდში ბიძინა ივანიშვილთან, თავის საზაფხულო რეზიდენციაში, შეხვედრა ჰქონდათ პროკურატურის წარმომადგნლებს, რომლებმაც დავალება მიიღეს ბიძინა ივანიშვილისგან, რომ ეს საქმე შეეკერათ ჩემი და “თავისუფალი დემოკრატების” წინააღმდეგ. ე.წ “კაბელების საკითხი” არის პოლიტიკური თემა, რომელშიც თავიდან ბოლომდე ჩართულია თავად ღარიბაშვილი, ივანიშვილთან ერთად. მათ მოახდინეს ორგანიზება ამ პოლიტიკური დანაშაულის. მართლაც გასაკვირია, რომ ღარიბაშვილს ეყო თავხედობა, არ შეაწუხა სინდისმა და თვითონ წამოწია ეს თემა საპარლამენტო განხილვისას. თავის დროზე, როდესაც პარტნიორებს ზურგში დანა ჩაგვარტყა და ხუთი უდანაშაულო ადამიანი გაუშვა ციხეში, მან დაკარგა სახე და გუშინდელი განცხადებაც ამის მიმანიშნებელი იყო. ღარიბაშვილს აწუხებს ერთი რამ – სასამართლო განხილვები ძალიან მალე დასრულდება, სიმართლეს ქართული საზოგადოება მალე გაიგებს და მოსთხოვს ღარიბაშვილს და ბიძინა ივანიშვილს პასუხს, თუ რატომ ჩასვა ხუთი უდანაშაულო ადამიანი ციხეში. მე ერთი რამ მინდა ვუთხრა ქართულ საზოგადოებას, “თავისუფალი დემოკრატები” როდესაც მოვალთ ხელისუფლებაში, მიზნად დავისახავთ, რომ უდანაშაულო ადამიანი არასოდეს არ მოხდეს საპყრობილეში და პოლიტიკური მართვისგან გათავისუფლდნენ სამართალდამცავი ორგანოები”, -განაცხადა ირაკლი ალასანიამ ჟურნალისტებთან.
”თავისუფალი დემოკრატების” გუშინდელი სხდომა პრემიერ-მინისტრსა და ფრაქციის წევრებს შორის შეკამათებით დასრულდა. ირაკლი ღარიბაშვილსა და ფრაქციის წარმომადგენლებს შორის სიტყვიერი შელაპარაკება ე.წ. კაბელების საქმეს მოჰყვა, რაზეც პრემიერმა საუბარი ისე დაიწყო, რომ მისთვის აღნიშნულ საკითხზე “თავისუფალი დემოკრატების” მხრიდან შეკითხვა არ დასმულა. ფრაქციის წევრების უკმაყოფილებაც სწორედ აღნიშნულს მოჰყვა.
