13-16 მაისს, საქართველოს ამერიკის შეერთებული შტატებიის ატლანტიკური საბჭო ეწვევა. როგორც საგარეო საქმეთა სამინისტროს სპიკერმა, დავით კერესელიძემ დღეს გამართულ პრესკონფერენციაზე განაცხადა, ვიზიტის მიზანია აშშ-ის ატლანტიკური საბჭოს ახალი ინიციატივის წამოწყება, რომელიც მიმართულია საქართველოს ევროატლანტიკური ინტეგრაციის მისწრაფებების ხელშესაწყობად. “ამ მიზნით, ატლანტიკური საბჭო მიზნად ისახავს ჩამოაყალიბოს ტრანსატლანტიკური სტრატეგია აღმოსავლეთ ევროპისთვის, რომლის მნიშვნელოვანი ნაწილიც არის აშშ-სა და ევროკავშირის სტრატეგიის ანალიზი და საქართველოს რეფორმებისა და ევროპული მისწრაფებების ხელშეწყობა”, – განაცხადა კერესელიძემ. მისივე თქმით, ვიზიტის ფარგლებში გაიმართება შეხვედრა საქართველოს პრეზიდენტ გიორგი მარგველაშვილთან, პრემიერ-მინისტრ ირაკლი ღარიბაშვილთან, პარლამენტის თავმჯდომარე დავით უსუფაშვილთან, უზენაესი სასამართლოს თავმჯდომარე ნინო გვენეტაძესთან და სხვა.
