ევროპის რეკონსტრუქციისა და განვითარების ბანკის პრეზიდენტმა სუმა ჩაკრაბატიმ აღნიშნა, რომ ეკონომიკური ზრდა რუსეთში არსებული ვითარების გამო არამხოლოდ საქართველოში, არამედ შუა აზიაშიც შენელდა.“საქართველოშიც და შუა აზიაშიც ეკონომიკური ზრდა შენელდა, რაც რუსეთში არსებულმა ვითარებამ განაპირობა, მაგრამ ამის მიუხედავად, საქართველოში ეკონომიკური ზრდის საფუძველი ძლიერია და სწორედ ამიტომაა EBRD-ის ინვესტიცია ყველაზე მაღალი. ჩვენ ამ ქვეყანაში პოტენციალს ვხედავთ. ოპტიმისტურად ვართ განწყობილნი, რომ მთავრობა და ეროვნული ბანკი შეძლებენ სიტუაციის კარგად წარმართვას და ეკონომიკური ზრდაც მომავალში ბევრად მაღალ დონეს მიაღწევს”, – განაცხადა ჩაკრაბატიმ.
რაც შეეხება ქვეყნის ეკონომიკური ზრდის მაჩვენებლის პროგნოზს, ევროპის რეკონსტრუქციისა და განვითარების პრეზიდენტის ინფორმაციით, აღნიშნული მაჩვენებელი კვირის ბოლოსთვის გახდება ცნობილი.
“ეკონომიკური ზრდის პროგნოზი კვირის ბოლოს გვექნება. უნდა აღინიშნოს, რომ რთული პერიოდია მთელი რეგიონისთვის და არამხოლოდ საქართველოსთვის, მაგრამ ის სხვებზე უკეთ ახერხებს სირთულეებთან გამკლავებას”, – განაცხადა EBRD-ის პრეზიდენტმა.
