საქართველოს საგანგებო და სრულუფლებიანმა ელჩმა ეგვიპტეში არჩილ ძულიაშვილმა ეგვიპტის სამოქალაქო ავიაციის მინისტრ ჰოსამ ქამალთან შეხვედრა გამართა . შეხვედრას ასევე ესწრებოდა კომპანია Air Cairo-ს აღმასრულებელი საბჭოს თავმჯდომარე იასერ რამლი.
როგორც “თბილისი თაიმსს” საქართველოს საგარეო საქმეთა სამინისტროდან აცნობეს, შეხვედრის მიზანს წარმოადგენდა თბილისსა და ეგვიპტის საკურორტო ქალაქებს შორის (შარმ ალ-შეიხი, ჰურგადა) პირდაპირი საჰაერო რეისების საკითხების განხილვა და ამ მიმართულებით, ორი ქვეყნის თანამშროლობის გაღრმავების პერსპექტივები.
“მხარეებმა აღნიშნეს, რომ საქართველოსა და ეგვიპტის ორმხრივი ურთიერთობების ისტორიაში პირველად 2014 წლის ნოემბერში ორ ქვეყნას შორის რეგულარული საჰაერო მიმოსვლა დაიწყო. ამჟამად კომპანია Air Cairo-ს მიერ თბილისსა და შარმ ალ-შეიხს შორის კვირაში სამი რეისი სრულდება.
ფრენების დაწყების შემდეგ ამ რეისით უკვე 15 000-ზე მეტი მგზავრი იქნა გადაყვანილი. აღსანიშნავია, რომ ეგვიპტის სამოქალაქო ავიაციის მინისტრი პირადად იყო ჩართული ორ ქვეყანას შორის პირდაპირი საჰაერო რეისების დაწყების საკითხებში. მინისტის განცხადებით, ეგვიპტის სამოქალაქო ავიაციის სამინისტრო ხელს უწყობს ეგვიპტის ტურისტული ქალაქების ევროპისა და მსოფლიოს სხვა ქვეყნებთან პირდაპირ ფრენებით დაკავშირებას. ამ მხრივ, ეგვიპტის სამოქალაქო ავიაციის სამინისტრო მიესალმება და ხელს შუწყობს ჰურგადასა და თბილისს შორის პირდაპირი ფრენების განხორიცელებას, რომელიც 2 ივნისიდან დაიწყება. ფრენებს განახორციელებს ეგვიპტური კომპანია Air Cairo და ის კვირაში ოთხჯერ შედგება”, – აცხადებენ საქართველოს საგარეო საქმეთა სამინისტროში.
შეხვედრაზე ასევე განიხილეს თბილისსა და კაიროს შორის პირდაპირი საჰაერო მიმოსვლის დაწყების შესაძლებლობა.
Discussion about this post