„როსპოტრებნადზორმა“ კიდევ ერთი ქართული ღვინის კომპანიის პროდუქცია დაიწუნა, შესაბამისად მას არ შეეძლება რუსეთში პროდუქციის შეტანა. ამის შესახებ „ინტერფაქსს“ უწყების ხელმძღვანელმა გენადი ონიშჩენკომ განუცხადა.
„გაცემულია კიდევ ათი დასკვნა შპს „იმედი-96“-ის ღვინის ნორმატივებთან შეუსაბამობის თაობაზე“, – აღნიშნა ონიშჩენკომ.
აქამდე სანიტარულმა სამსახურმა დარღვევები ნახა იმ პროდუქციაში, რომლებიც ექსპერტიზაზე ქართულმა კომპანია „შუხმან ვაინსმა“ შეიტანა. „როსპოტრებნადზორმა“ ასევე დაბლოკა კომპანია „ასკანელი ძმების“ ხუთი დასახელების კონიაკი.
ამასთან, როგორც ონიშჩენკომ აღნიშნა, სულ დაბლოკილია აღნიშნული სამი მწარმოებლის 17 დასახელების პროდუქცია.
„14 მარტიდან 13 ივნისის ჩათვლით რუსეთის ფედერაციაში რეგისტრაციაზე 334 განაცხადი შევიდა, რომლებიც 25 ქართული ალკოჰოლური სასმელების და 2 მინერალური წყლის კომპანიმ წარადგინა. აქედან, სახელმწიფო რეგისტრაციის გავლა 12 მწარმოებლის 152 დასახელების პროდუქციამ შეძლო. ამასთან, 7 კომპანიის ალკოჰოლური პროდუქციის 81 ნიმუში ექსპერტიზას გადის“, – განაცხადა გენადი ონიშჩენკომ.
აქვე, ონიშჩენკომ აღნიშნა, რომ საქართველომ უკვე მიიღო, რუსი ექსპერტების მესამე ინსპექციის გრაფიკის პროექტი.
„34 საწარმო, მათ შორის 6 ხელახალ გამოკვლევას გადის. გრაფიკი ჯერჯერობით შეთანხმებული არ არის. გამგზავრებამდე ჩვენ დოკუმენტები უნდა შევისწავლოთ“, – აღნიშნა ონიშჩენკომ.
ქართულმა კომპანია „ბორჯომმა“ უკვე დაიწყო პროდუქციის შეტანა რუსეთის ფედერაციაში. რუსეთის ფედერაციის მიმართულებით ასევე დაიძრა „კახური ტრადიციული მეღვინეობის“ კონიაკი და „დუგლაძის ღვინის კომპანიის“ ღვინით დატვირთული მანქანები.
16.06.13
