ათასწლეულის გამოწვევის ფონდი – საქართველო „პროფესიული განათლება ეკონომიკის განვითარებისთვის“ პროექტის ფარგლებში, იწყებს საგრანტო კონკურსს საგანმანათლებლო დაწესებულებებისთვის. პროექტის პრეზენტაცია დღეს გაიმართა, რომელსაც პროექტის ხელმძღვანელი, დევიდ ჰენდლი უძღვებოდა. ღონისძიებას ესწრებოდნენ საქართველოს განათლებისა და მეცნიერების მინისტრი თამარ სანიკიძე, ათასწლეულის გამოწვევის ფონდი-საქართველოს აღმასრულებელი დირექტორი მაგდა მაღრაძე, აშშ-ის ათასწლეულის გამოწვევის კორპორაციის რეგიონული ვიცე-პრეზიდენტის მოადგილე ევროპის, აზიისა და ლათინური ამერიკის ქვეყნებში ფატიმა სუმარი და სხვა მოწვეული სტუმრები.
კონკურსის მიზანია შრომის ბაზრის მოთხოვნის შესაბამისი ახალი პროფესიული საგანმანათლებლო პროგრამების შექმნისა ან არსებული პროგრამების განახლებასთან დაკავშირებული წინადადებების დაფინანსება საბუნებისმეტყველო, საინჟინრო და ტექნოლოგიების, სოფლის მეურნეობისა და ტურიზმის სექტორებში.
საგრანტო კონკურსის სრული ბიუჯეტია 12 მილიონი აშშ დოლარი. თითოეული გრანტის მოცულობა შესაძლოა იყოს 300,000 აშშ დოლარიდან 3 მილიონ აშშ დოლარამდე. კონკურსში მონაწილეობის მიღება შეუძლიათ სახელმწიფო და კერძო პროფესიულ სასწავლებლებს, უმაღლეს საგანმანათლებლო დაწესებულებებს, კომპანიებს, არასამთავრობო ორგანიზაციებსა თუ სხვა იურიდიულ პირებს, რომლებიც ახორციელებენ ან აპირებენ საქმიანობის დაწყებას პროფესიული სწავლებისა და განათლების სფეროში.
პროფესიული განათლების სექტორში არსებული მდგომარეობის ანალიზისა და წინასწარი წინადადებების შეგროვების საფუძველზე, განისაზღვრა საგრანტო კონკურსის მთავარი მიზნები, შემუშავდა დეტალური საგრანტო სახელმძღვანელო და შერჩევის და შეფასების გამჭვირვალე პროცედურები.
საგრანტო კონკურსის ერთ-ერთი მთავარი მოთხოვნაა ბიზნესისა და დამსაქმებელთა მონაწილეობა წარდგენილ პროექტში, მათ შორის თანადაფინანსების სახით. საგრანტო პროექტები უნდა განხორციელდეს გარემოს, სოციალური, ჯანმრთელობის, უსაფრთხოების დაცვისა და გენდერული საკითხების საერთაშორისო სტანდარტების შესაბამისად.
წინადადებების წარდგენის პროცესი შედგება ორი ნაწილისგან: 1. პროექტის კონცეფციის წარმოდგენა; 2) სრული განაცხადის წარდგენა (მხოლოდ პირველ ეტაპზე შერჩეული აპლიკანტებისთვის). პროექტის კონცეფციის წარდგენის ბოლო ვადაა 2015 წლის 14 სექტემბერი.
მოთხოვნა წინადადების მიწოდებაზე (RfP) და განაცხადის ფორმები შეგიძლიათ იხილოთ ვებგვერდზე: www.mcageorgia.ge
