საქართველოს პარლამენტის თავმჯდომარის, დავით უსუფაშვილის განცხადებით, ბოლო წლებში კონსტიტუციას ახალი მკითხველები გამოუჩნდა საქართველოს პრეზიდენტის, პრემიერ-მინისტრის, მოქალაქეების სახით. როგორც უსუფაშვილმა პრეზიდენტის რეზიდენციაში, კონსტიტუციის დღისადმი მიძღვნილ საზეიმო მიღებაზე განაცხადა, სასიხარულოა, რომ საქართველოს მოქალაქეები სულ უფრო მეტად და მეტად ინტერესდებიან, რა წერია კონსტიტუციაში.
“გილოცავთ დღევანდელ დღეს, საქართველოს კონსტიტუციის მიღების დღეს, საქართველოს სახელმწიფოს კონსტიტუციური დამკვიდრების დღეს. მოხარული ვარ, რომ საქართველოს კონსტიტუცია ნელ-ნელა იმკვიდრებს თავის სათანადო მნიშვნელოვან ადგილს ჩვენს სახელმწიფოებრივ ცხოვრებაში. საქართველოს კონსტიტუცია ხდება გამაერთიანებელი დოკუმენტი, გამაერთიანებელი ტექსტი განსხვავებული მსოფლმხედველობის, განსხვავებული აღმსარებლობის საქართველოს მოქალაქეებისთვის. ნიშანდობლივია ის ფაქტი, რომ ბოლო წლებში კონსტიტუციას ახალი მკითხველები გამოუჩნდა. საქართველოს პრეზდიენტის, პრემიერ-მინისტრის, მოქალაქეების სახით. სასიხარულოა, რომ საქართველოს მოქალაქეები სულ უფრო მეტად და მეტად ინტერესდებიან რა წერია კონსტიტუციაში”, – განაცხადა უსუფაშვილმა.
მისივე თქმით, “ზოგჯერ კონსტიტუციას სხვადასხვანაირად ვკითხულობთ, მაგრამ ამისთვის საკონსტიტუციო სასამართლო გვყავს, რომელიც სათანადოდ განსჯის ასეთ საკითხებს.
“ეს არის სწორი გზა, ეს არის ის გზა, რომელიც მიგვიყვანს დემოკრატიულ, კონსტიტუციურ წესრიგამდე. მოხარული ვარ, რომ ბოლო წლებში ყველაფერ ამას განსაკუთრებული სტიმული და განსაკუთრებული ენთუზიაზმი მიეცა”, – აღნიშნა უსუფაშვილმა.
მისივე თქმით, კონსტიტუცია ეს არის იარაღი ხალხის ხელში ტირანიის და ავტორიტარიზმის წინააღმდეგ, რომელიც საქართველოში აღარასოდეს განმეორდება.
