დღეს, 13:00 საათზე, კულტურის სამინისტროში თბილისის მეორე ტრიენალესთან დაკავშირებით პრესკონფერენცია გაიმართება, რომელსაც საქართველოს კულტურისა და ძეგლთა დაცვის სამინისტროს კულტურის პოპულარიზაციისა და რეგიონული პროგრამების დეპარტამენტის დირექტორი ანა რაბოშენკო, თბილისის მერის მოადგილე ნინა ხატისკაცი და ტრიენალეს დირექტორი და კურატორი ვატო წერეთელი გაუძღვებიან.
როგორც “თბილისი თაიმსს” კულტურის სამინისტროდან აცნობეს, საქართველოს კულტურისა და ძეგლთა დაცვის სამინისტროსა და თბილისის მერიის კულტურული ღონისძიებების ცენტრის მხარდაჭერითა და თანამედროვე ხელოვნების ცენტრის ორგანიზებით თბილისის მეორე ტრიენალე 1 ოქტომბერს, 19:00 საათზე, თანამედროვე ხელოვნების ცენტრის საგამოფენო სივრცეში გაიხსნება. თანამედროვე ხელოვნების საერთაშორისო საგამოფენო პროგრამის მთავარი თემაა „თვითორგანიზებადი სისტემები“.
წლევანდელ ტრიენალეში მონაწილეობას იღებს 109 ქართველი და უცხოელი არტისტი 14 სხვადასხვა ქვეყნიდან (საქართველო, დანია, ფინეთი, ავსტრია, ავსტრალია, ესპანეთი, აშშ, თურქეთი, იტალია, ახალი ზელანდია, ლიტვა, ჩეხეთი, შვეიცარია, კოლუმბია, სლოვაკეთი, შვედეთი, ნორვეგია, გერმანია, ბელორუსი, ნიდერლანდები, აზერბაიჯანი, დიდი ბრიტანეთი, სომხეთი). ერთი თვის განმავლობაში დაგეგმილია გამოფენები 8 საგამოფენო და სხვადასხვა საზოგადოებრივ სივრცეში.
ტრიენალე საერთაშორისო გამოფენაა, რომელიც სამ წელიწადში ერთხელ იმართება და მისი ორგანიზატორია თანამედროვე ხელოვნების ცენტრი-თბილისი (CCA-თბილისი). პირველი ტრიენალე CCA 2012 წელს გაიმართა და მის მთავარ თემას არაფორმალური სახელოვნებო განათლება წარმოადგენდა. პროგრამა ერთი თვის განმავლობაში გამოფენების, ვორკშოპებისა და სხვა საზოგადოებრივი აქტივობის სერიას აერთიანებდა, რომელშიც ჩართული იყვნენ არტისტები, კურატორები, შემოქმედებითი კოლექტივები და თეორეტიკოსები მსოფლიოს 14 ქვეყნიდან. 2014 წლის ივლისში თბილისის ტრიენალე მსოფლიო ბიენალეების საერთაშორისო ასოციაციის (IBA) ასოცირებული წევრი გახდა.
პროექტი დაფინანსებულია საქართველოს კულტურისა და ძეგლთა დაცვის სამინისტროს, თბილისის მერიის კულტურული ღონისძიებების ცენტრისა და სამხრეთ კავკასიაში შვეიცარიის თანამშრომლობის ოფისის (SCO) მიერ.
