ახალი სასწავლო-სააღმზრდელო წლიდან თბილისის ყველა საჯარო ბაგა-ბაღისათვის სანიტარიის, ჰიგიენისა და სამედიცინო ეკოლოგიის სამეცნიერო-კვლევითი ინსტიტუტის სპეციალისტების მიერ შემუშავებული იქნა ბავშვთა კვების რაციონი, რომელიც გასულ წლებთან შედარებით მრავალფეროვანია და მოიცავს ყველა იმ საჭირო საკვებ პროდუქტს, რომელიც აუცილებელია ბავშვის სრულფასოვანი ზრდა განვითარებისთვის.
ბაგა-ბაღების მართვის სააგენტოს ინფორმაციით, ასევე, გასულ სასწავლო-სააღმზრდელო წელთან შედარებით 300 კილო კალორიით გაიზარდა საკვები რაციონის კალორიულობა, რომელიც შესაბამისობაში მოვიდა 2014 წლის 15 იანვრის #78 დადგენილებასთან „ბავშვთა სკოლამდელ დაწესებულებებში კვების ორგანიზაციის სანიტარული წესებისა და ნორმების დამტკიცების შესახებ’’.
მათივე ცნობით, ახალი მენიუსთვის საჭირო საკვები პროდუქტების შესყიდვის მიზნით გამოცხადდა ელექტრონული ტენდერები, რომლითაც განისაზღვრა შესასყიდი საქონლის ტექნიკური და ხარისხობრივი მაჩენებლები და ის მოთხოვნები, რომელთა დაკმაყოფილების შედეგად გამოვლენილი იქნა გამარჯვებული კომპანიები. აღნიშნული ტენდერების საფუძველზე ასევე დადგინდა საკვები პროდუქტების მიწოდება-შენახვის ვადები.
გასულ პერიოდში საბავშვო ბაგა-ბაღები საკვები პროდუქტების შესყიდვას ახორციელებდნენ ინდივიდუალური ხელშეკრულებების საფუძველზე, რომელიც არ მოიცავდა ინფორმაციას საქონლის ტექნიკური მახასიათებლების, აღწერილობის, საქონლის ვადებისა და მიწოდების პირობების შესახებ.
ბაგა-ბაღების მართვის სააგენტოს ინფორმაციით, ზემოაღნიშნული ტენდერების საფუძველზე დაიხვეწა როგორც მისაწოდებელი საქონლის ტექნიკური პირობები, ისე ხელშეკრულების ყველა სხვა პირობა, რომლის საფუძველზეც საბავშვო ბაგა-ბაღს მიეცა მეტი შესაძლებლობა მოითხოვოს მიმწოდებლისაგან ხელშეკრულებით განსაზღვრული ოდენობისა და ხარისხის საქონლის მიწოდება ამავე ხელშეკრულებაში მოცემული ვადების შესაბამისად.
