საქართველოს მორაგბეთა ეროვნული ნაკრები თბილისში დაბრუნდა. ქართველი მორაგბეების თვითმფრინავი თბილისის საერთაშორისო აეროპორტში გამთენიისას, 03:05 საათზე დაეშვა. “ბორჯღალოსნებს” აეროპორტში გულშემატკივრები შეძახილებით დახვდნენ, გაუშვეს ფერადი ქაღალდების ფოიერვერკებიც.
“ქართველი მორაგბეების თამაშით ამაყები ვართ. ბიჭებმა მსოფლიოს თასი ღირსეულად ჩაატარეს და ფაქტობრივად გაინაღდეს შემდგომ მსოფლიოს თასზე თამაში. დარწმუნებულები ვართ, რომ 2019 წელს, ჩვენი ბიჭები იაპონიაში კიდევ უფრო დიდ წარმატებას მიაღწევენ”, – ამბობდნენ გულშემატკივრები.
ქართველი მორაგბეები საქართველოს ნაკრების თამაშს დადებითად აფასებენ. “ბორჯღალოსნებმა” გულშემატკივარს მადლობა გადაუხადეს და სამახსოვროდ ავტოგრაფებიანი რაგბის ბურთებიც აჩუქეს.
“ყველაზე დიდი სიამოვნება, რაც მივიღეთ, ამდენი გულშემატკივრის დახვედრაა. ვულოცავთ საქართველოს ამ დიდ გამარჯვებას. ქართული რაგბის ისტორიაში მსოფლიოს თასზე ახალი ფურცელი დაიწერა, რადგან პრაქტიკულად გავინაღდეთ მსოფლიოს თამაშზე თამაში საკვალიფიკაციო ეტაპის გარეშე. გილოცავთ ყველას ამ გამარჯვებას”, – განაცხადა საქართველოს ნაკრების ერთ-ერთმა, ლიდერმა დავით კაჭარავამ.
“ბორჯღალოსნებს” აეროპორტში სპორტისა და ახალგაზრდობის საქმეთა სამინისტროს წარმომადგენლებიც დახვდნენ. მინისტრის პირველი მოადგილის, აკაკი ლოდიას განცხადებით, ქართველმა მორაგბეებმა ბრწყინვალედ იასპარეზეს.
“მათ ბრწყინვალედ ითამაშეს და სძლიეს არამარტო მეტოქეებს, მსაჯებსაც. ძალიან მაგარი განწყობა და ემოციები გვაქვს. ცხადია, რომ ქართული რაგბი წინ მიდის და მომავალში უფრო და უფრო დიდი შედეგები გველოდება”, – აღნიშნა ლოდიამ.
საქართველოს მორაგბეთა ეროვნულმა ნაკრებმა მსოფლიოს თასზე ორი გამარჯვება მოიპოვა და პრაქტიკულად გაინაღდა 2019 წელს, იაპონიაში გასამართი მსოფლიო თასის საგზური.
მილტონ ჰეიგის გუნდმა 19 სექტემბერს ტონგა 17:10 დაამარცხა, 25 სექტემბერს შეხვედრა არგენტინასთან 9:54 დათმო, 2 ოქტომბერს კი ახალ ზელანდიასთან 10:43 წააგო. საქართველომ 7 ოქტომბერს გადამწყვეტი შეხვედრა ნამიბიასთან გამართა და 17:16 გაიმარჯვა. საქართველოს ნაკრების რამდენიმე მორაგბე (მამუკა გორგოძე, დავით ზირაქიშვილი, გიორგი ნემსაძე, ლევან დათუნაშვილი, ვიქტორ კოლელიშვილი, ლაშა მალაღურაძე, მერაბ კვირიკაშვილი, ანტონ ფეიქრიშვილი და კოტე მიქაუტაძე) პირდაპირ საფრანგეთში გაფრინდა და საკუთარ კლუბებს დაუბრუნდნენ. ინგლისში მსოფლიო თასის დასრულებამდე დარჩება რაგბის კავშირის პრეზიდენტი გიორგი ნიჟარაძე, რომელიც შეხვედრებს გამართავს.
საქართველოში კი შემდეგ მორაგბეები დაბრუნდნენ: მიხეილ ნარიაშვილი, კახა ასიეშვილი, შალვა მამუკაშვილი, სიმონ მაისურაძე, ჯაბა ბრეგვაძე, ლევან ჩიალაჩავა, გიორგი ჩხაიძე, შალვა სუთიაშვილი, გიორგი თხილაიშივილი, ლაშა ლომიძე, ბექა წიკლაური, სანდრო თოდუა, თამაზ მჭედლიძე, გიორგი აფციაური, მურაზ გიორგაძე, გიორგი ფრუიძე, დავით კაჭარავა, მერაბ შარიქაძე, ლაშა ხმალაძე, გიორგი ბეგაძე, ვაჟა ხუციშვილი, ვასილ ლობჟანიძე და მთავარი მწვრთნელი მილტონ ჰეიგი.
