სტუდენტები სტუდენტის გადასარჩენად!

18 ნოემბერს თბილისის სახელმწიფო უნივერსიტეტის  პირველ კორპუსის ეზოში საქველმოქმედო ბაზრობა – Luka’s flea market  გაიმართება. ამავე უნიევრსიტეტის სოციალურ და პოლიტიკურ მეცნიერებათა ფაკულტეტის ჟურნალისტიკის მიმართულების მეორე კურსის სტუდენტ –19 წლის ლუკა დავიანტის თავის ტვინის სიმსივნე აღმოაჩნდა.  ურთულესი ოპერაცია უკვე ჩატარდა, თუმცა   რეაბილიტაციისთვის აუცილებელია  საზღვარგარეთ ძვირადღირებული მკურნალობა,  რაც 50 000 ლარს შეადგენს. სამწუხაროდ, ოჯახს ამისი საშუალება არ აქვს. ოჯახის ნათესავების, მეგობრების, მეზობლების, სტუდენტების  მიერ შეგროვებული თანხა კატასტროფულად ცოტაა.   თბილისის სახელმწიფო უნივერსიტეტში უკვე ჩატარდა რამდენიმე საქველმოქმედო ღონისძიება, სადაც ორგანიზატორებმა თანხის ნაწილის შეგროვება მოახერხეს, თუმცა სარეაბილიტაციო კურსისთვის საჭირო ხარჯები ბევრად უფრო დიდია. ამიტომაც, თბილისის სახელმწიფო უნივერსიტეტის ჟურნალისტიკის მიმართულების სტუდენტების ორგანიზებით, flea მარკეტი გაიმართება, სადაც მოხალისეების მიერ შემოწირული სხვადასხვა ნივთი გაიყიდება. გარდა ამისა, ორგანიზატორების თქმით, მყიდველებს გემრიელი ბლინები, ნამცხვრები, გლიტვეინი, ყავა და ჩაი ელით. ,,დიდი იმედი გვაქვს, რომ დახმარების სურვილს ბევრი ადამიანი გამოთქვამს. ჩვენ, სტუდენტები, დიდ ძალას წარმოვადგენთ, ეს აუცილებლად უნდა დავამტკიცოთ. ყველას მოვუწოდებ, რომ ერთად დავდგეთ ლუკას გადასარჩენად. ასეთ დროს უმოქმედობა დიდი დანაშაულია“ – აღნიშნავს ერთ–ერთი ორგანიზატორი – ბაჩო ადამია. მათთვის კი, ვინც flea მარკეტზე მისვლას ვერ ახერხებს, ლუკა დავიანტის სახელზე ,,ლიბერთი ბანკში“  ანგარიშია გახსნილი. ანგარიშის ნომერია: GE74LB0711119238796000 ნატალია ჯალაღონია