სოფლის მეურნეობის სამინისტროს სსიპ სურსათის ეროვნული სააგენტო განაგრძობს საბავშვო ბაღების კვების ბლოკებისა და სკოლის ბუფეტების ინსპექტირებას მთელი ქვეყნის მასშტაბით. მიმდინარე წლის ნოემბერში ჩატარდა 290 ინსპექტირება (გეგმური – 40 საბავშვო ბაგა-ბაღსა და 4 სკოლაში, არაგეგმური – 2 სკოლაში, გადამოწმდა 213 საბავშვო ბაგა-ბაღი და 31 სკოლის ბუფეტი).
როგორც “თბილისი თაიმსს” სააგენტოდან აცნობეს, გადამოწმებისას რეკომენდაციების შეუსრულებლობის გამო 400 ლარით დაჯარიმდა 5 საბავშვო ბაღი.
ინსპექტირებისას კრიტიკული შეუსაბამობები არ გამოვლენილა და, შესაბამისად, არცერთი საბავშვო ბაღის კვების ბლოკსა და სკოლის ბუფეტს საწარმოო პროცესი არ შეჩერებია. ძირითადად, დარღვევები გამოიხატა შემდეგში – ჭურჭლის გასარეცხი და ხელსაბანი ნიჟარების არასაკმარისი რაოდენობა, ცხელი წყლისა და შესაბამისი ჰიგიენური საშუალებების, სათანადო ვენტილაციის, დეზობარიერების, მწერებისაგან დამცავიბადის არარსებობა, დამცავი ტანისამოსის არქონა და ა. შ.
აღნიშნული შეუსაბამობების გამოსწორების მიზნით ბიზნესოპერატორებს მიეცათ რეკომენდაციები და ვადები, რის შემდეგაც სურსათის ეროვნული სააგენტოს ინსპექტორები გადამოწმებას განახორციელებენ.
2015 წლის იანვრიდან დღემდე, წინასწარი მონაცემებით, სასკოლო და სკოლამდელ დაწესებულებებში ჩატარებულია 2011 ინსპექტირება, მათ შორის, საბავშვო ბაგა-ბაღებში 1650 (გეგმური – 941, არაგეგმური – 13, გადამოწმება 696) და სკოლის ბუფეტებში – 361 (293 – გეგმური; 4 – არაგეგმური; 64-გადამოწმება).
საააგენტოს ინფორმაციით, ინსპექტირების პროცესი კვლავ გრძელდება.
