ჩვენს დედაქალაქში, თბილისში უკვე დიდიხანია უპატრონო ძაღლების საკითხი ძალიან აქტუალურია. ბოლო დროს, მოსახლეობა შეშფოთებას გამოთქვამს ქუჩებში მომრავლებული უპატრონო ცხოველების გამო. ქუჩაში მცხოვრები ძაღლები, ხშირად სხვადასხვა ინფექციური დაავადების გადამტანები არიან, რაც საზოგადოებისთვის საფრთხეს წარმოადგენს. აღნიშნული საფრთხეების თავიდან აცილებისთვის, ცხოველთა უფლებების დაცვა და მოსახლეობის უსაფრთხოებაზე ზრუნვა აუცილებელია, შესაბამისად სახელმწიფო ვალდებულია დაიცვას შინაური ცხველები და შექმნას მათთვის აუცილებელი საარსებო პირობები.
2015 წლის 1 იანვრიდან არსებობს ცხოველთა მონიტორინგის სააგენტო, რომლის ფუნქციაა მოსახლეობის დაცვა აგრესიული ან დაავადებული ცხოველებისგან, ასევე უპატორნო ცხოველების მართვა და კონტროლი. 2015 წლის 1იანვრიდან დღემდე სააგენტომ 12100-ზე მეტ შეტყობინებაზე მოახდინეს რეაგირება. ცხოველთა მონიტორინგის სამსახური უარყოფს იმ ფაქტს, რომ ქუჩებში გაიზარდა უპატრონო ძაღლების რაოდენობა. მათივე განცხადებით ისინი მაქსიმალურად აკონტროლებენ ვითარებას. მერიის მიერ გამოყოფილი თანხით კი უზრუნველყოფენ ცხოველების მოვლა – პატრონობას. ალბათ ძალიან ცოტამ თუ იცის, რომ არსებობს ცხოველთა თავშესაფარი, რომელსაც სახელწიფო ინახავს და აფინანსებს, აქ დაახლოებით 160–170 მდე უპატრონო ცხოველს ითვლიან.
თბილისის მერიის სსიპ “ცხოველთა მონიტორინგის სამსახურის” დირექტორი თეიმურაზ ფხალაძე: “ცხოველების პრობლმები დიდი ხანია რაც არსებობს, სააგენტოს ცუდი მემკვიდრეობა და საზოგადოებაში აგრესიული ფონი დახვდა. ცხოველები შესამოწმებლად გადაგვყავს თავშესფარში, იქ მათ უტარდებათ ლაბორატორიული გამოკვლევები. იმ შემთხვევაში თუ ცხოველი აგრესიული არ არის და საფრთხეს არ წარმოადგენს მოსახლეობისათვის მათ უტარდებათ სტერილიზაცია, კასტრაცია და სხვადასხვა ვაქცინაცია, ხოლო ამის შემდეგ ხდება მათი გაჩუქება, მიკედლება ან ისევ უბრუნდება ბინადრობის პირვანდელ არეალს. ცხოველთა დაძინება ხდება კანონის ფარგლებში. თუ უპატრონო ძაღლი არის დაავადებული, საფრთხის და აგრესიის მატარებელი, სამწუხაროდ, ასეთ შემთხვევაში ჩვენ ვალდებულნი ვართ დავაძინოთ ისინი,“ – აცხადებს „თბილისი თაიმსთან“ საუბრისას თეიმურაზ ფხალაძე.
მისივე ინფორმაციით, ცხოველების იზოლირება ხდება ოთხ ძირითად საფუძველზე, იმ შემთხვევაში თუ ცხოველი აგრესიულია, დაავადებულია, დაკარგულია და გასაჭირში იმყოფება.
„მალე გახდება ცნობილი თუ რამდენი უპატრონო ძაღლია სულ თბილისში. მსგავსი აღწერა პირველად, ცხოველთა მონიტორინგის სააგენტოს მეშვეობით მოხდა ,“ – განმარტავს ფხალაძე.
13 ივნისის სტიქიის შემდეგ, 408-მდე ძაღლის სიცოცხლე გადაარჩინა თამაზ ელიზბარაშვილის ძაღლთა თავშესაფარმა. როგორც თამაზ ელიზბარაშვილი „თბილისი თაიმსთან“ აცხადებს, დღის წესრიგშია ახალი უფრო დიდი თავშესაფარის გაკეთება და მეტი ცხოველის გადარჩენა და დახმარება.
“დღეისათვის თავშესაფარში 155 ძაღლი იმყოფება. ქუჩაში ბევრი ძაღლია, სახელმწიფო ვერ უმკლავდება ბოლომდე ამ პრობლემას, ამიტომ ჩემი საქმიანობით ვეხმარები როგორც უპატრონო ძაღლებს, ასევე სახელმწიფოს. ძირითადად მოსახლეობა გვატყობინებს გასაჭირში მყოფი ცხოველის შესახებ და ჩვენც შესაბამისად ვრეაგირებთ და ვმოქმედებთ. საკუთარი ფინანსებით ვუტარებთ საჭირო ოპერაციებს. მე არა სახელმწიფოსთან არამედ საქართველოსთან ვთანამშრომლობ,“- აცხადებს თამაზ ელიზბარაშვილი.
ადამიანებს აკისრიათ მორალური ვალდებულება ყველა ცოცხალი არსების მიმართ განსაკუთრებით შინაური ცხოველების წინაშე, რადგან მათთან განსაკუთრებული სიახლოვე აკავშირებთ. ნიშვნელოვანია მოსახლეობა მაქსიმალურად იყოს ინფორმირებული თუ ვის მიმართოს უპატრონო გასაჭირში მყოფი ცხოველის ნახვისას. ასევე აუცილებლად უნდა გაფართოვდეს არსებული თავშესაფარი რადგან 170 ადგილი თავშესაფარში არის ძალიან ცოტა, როდესაც ყველა ქუჩაზე ათობით უპატრონო ძაღლს ვაწყდებით.
მარიამ ფანჩულიძე
