თბილისის მერიაში განახლებული „მდგრადი ენერგეტიკის სამოქმედო გეგმის“ (SEAP) პრეზენტაცია გაიმართა. პრეზენტაციას თბილისის მერი დავით ნარმანია, მერის მოადგილეები, საქალაქო სამსახურების და მერიაში შემავალი უწყებების ხელმძღვანელები დაესწრნენ.
განახლებული „მდგრადი ენერგეტიკის სამოქმედო გეგმა“ თბილისის მერიის ეკონომიკური პოლიტიკის საქალაქო სამსახურმა არასამთავრობო ორგანიზაცია “რემისიასთან” ერთად შეიმუშავა. დოკუმენტი დედაქალაქის მთავრობას არასამთავრობო ორგანიზაცია „რემისიას“ წარმომადგენლებმა გააცნეს.
„მდგრადი ენერგეტიკის სამოქმედო გეგმა“ მოიცავს პროექტებს ტრანსპორტის, შენობების, მუნიციპალური ინფრასტრუქტურის (გარე განათება, ნაგავსაყრელები) და მწვანე სივრცეების განვითარების სექტორებში. SEAP შემუშავებულია “მერების შეთანხმების” ფარგლებში. „მერების შეთანხმება“, რომელსაც თბილისი 2010 წელს მიუერთდა, 2020 წლამდე CO2-ის ემისიების მინიმუმ 20%-ით შემცირებას ითვალისწინებს.
დღესვე თბილისის მთავრობა SEAP-ის განხორციელების ანგარიშსაც გაეცნო, სადაც წარმოდგენილი იყო სამოქმედო გეგმის მიხედვით თითოეულ სექტორში მიღწეული შედეგები 2010 წლიდან დღემდე. SEAP-ის განხორციელების მონიტორინგი ეკონომიკური პოლიტიკის საქალაქო სამსახურმა არასამთავრობო ორგანიზაცია “რემისიასთან” ერთად განახორციელა.
“მერების შეთანხმების” ფარგლებში აღებული ვალდებულების მიხედვით SEAP -ის მონიტორინგი ორ წელიწადში ერთხელ უნდა განხორციელდეს.
