ენერგეტიკის მინისტრის მოადგილემ ილია ელოშვილმა სამტრედიასა და ზუგდიდში დიდთოვლობის გამო დაზიანებული ელექტროგადამცემი ხაზების აღდგენითი სამუშაოები დაათვალიერა. როგორც “თბილისი თაიმსს” საქართველოს ენერგეტიკის სამინისტროდან აცნობეს, მინისტრის მოადგილე ასევე გაეცნო მაღალმთიან გურიასა და აჭარაში მიმდინარე სარეაბილიტაციო სამუშაოებს. დიდთოვლობისა და ძლიერი ქარის გამო, დასავლეთ საქართველოში სამეგრელოს, გურიის, აჭარისა და იმერეთის რეგიონებში მცხოვრები მოსახლეობის ნაწილს ელექტროენერგია არ მიეწოდებოდა. ამ ეტაპზე, ელექტროენერგიის გარეშე 15 000 აბონენტი არის დარჩენილი. “მოსახლეობისათვის ეტაპობრივად ხდება ელექტროენერგიის მიწოდების აღდგენა. დღის ბოლომდე, თუ ამინდმა ხელი შეგვიწყო, მოსახლების 90%-ს ელექტროენერგიის მიწოდება აღუდგება. განსაკუთრებულ პრობლემას წარმოადგენს მაღალმთიანი სოფლები, სადაც გზის გაწმენდითი სამუშაოების გამო, აღდგენითი სამუშაოები ფერხდება”, – განაცხადა ილია ელოშვილმა. უწყების ინფორმაციით, კომპანია “ენერგო-პრო ჯორჯია” 24-საათიან საგანგებო რეჟიმში მუშაობს და დაზიანებული უბნების აღდგენა ეტაპობრივად ხდება.
