საქართველოს პრეზიდენტი პირველ ლედისთან ერთად ზურაბ ჟვანიას სახელობის წინანდლის პრემიის გამარჯვებულთა დაჯილდოების ცერემონიას დაესწრო, რომელიც წელს ყვარელში გაიმართა. როგორც
პრეზიდენტის ადმინისტრაციის ინფორმაციით, გიორგი მარგველაშვილმა შეკრებილ სტუმრებს სიტყვით მიმართა და ახალგაზრდა ხელოვანების წარმოჩენის ხელშეწყობის მნიშვნელობაზე გაამახვილა ყურადღება.
“ძალიან მნიშვნელოვანია ის, რაც დაიწყო ზურაბ ჟვანიამ. მის მიერ განსაკუთრებული ყურადღება ეთმობოდა, რომ გამოეყო საქართველოში უმნიშვნელოვანესი, ის რაც არის ხელოვნება, მეცნიერება და ახალგაზრდობა, რომელიც ამაში არის ჩართული. მაშინ შეიძლება ბოლომდე არ გვესმოდა, მაგრამ დღეს უკვე მემკვიდრეები ვართ ამ პროცესის. მადლობა ნინოს, რომ ზურას ეს წამოწყება განაგრძო და ახალი ძალა შემატა. მინდა მოგილოცოთ ნომინანტებს, ლაურეატებს, ყველას ვინც მონაწილეობთ ამ პროცესში გისურვოთ წარმატება და მომავალი შემოქმედებითი გამარჯვება. იცოდეთ, რომ მუდმივად მხარს გიჭერთ, თქვენს გვერდით ვარ და ვცდილობ, რომ განვაგრძო ის მნიშვნელოვანი წამოწყებები, რაც იყო საქართველოში და ბუნებრივია მომავალშიც გაგრძელდება,”- აღნიშნა საქართველოს პრეზიდენტმა სიტყვით გამოსვლისას.
წინანდლის პრემია საქართველოს პრეზიდენტის ხელშეწყობით 2014 წელს აღდგა და უკვე მეორე წელია გიორგი მარგველაშვილის პატრონაჟით იმართება.
პროექტის საკონკურსო ეტაპზე გამოვლენილ ნომინანტებს შორის 19 გამარჯვებული დასახელდა. საქართველოს პრეზიდენტმა წინანდლის პრემიის სპეციალური პრიზი განსაკუთრებული მიღწევისათვის ახალგაზრდა მუსიკოსს ბექა გოჩიაშვილს გადასცა. წინანდლის პრემია 1998 წელს ზურაბ ჟვანიას ინიციატივით დაარსდა და მიზნად ახალგაზრდა მეცნიერებისა და შემოქმედების წახალისებას და თანამედროვე ნამუშევრების საზოგადოებისთვის წარდგენას ისახავს. ღონისძიებას ეროვნული უშიშროების საბჭოს მდივანი ირინე იმერლიშვილი, საქართველოს პრეზიდენტის ადმინისტრაციის უფროსი გიორგი აბაშიშვილი და ზურაბ ჟვანიას ოჯახის წევრები დაესწრნენ.
