ამერიკულმა სპორტულმა ტოკშოუ Starters-მა საქართველოსა და ზაზა ფაჩულიაზე ხუმრობის გამო ბოდიში მოიხადა. ამის შესახებ ინფორმაციას ,,სტარტერსის“ ოფიციალურ ფეისბუკგვერდზე ნახავთ.
საუბარია ერთ-ერთ გადაცემაზე, რომელშიც წამყვანებმა All Star-ში საქართველოს ნაკრების კაპიტანისთვის ხმის მიცემაზე ისაუბრეს. მათ გაკვირვება გამოხატეს იმის გამო, რომ ფაჩულია, რომელიც 13 წელია NBA-ს ცენტრია, აქამდე ასე ახლოს არასდროს ყოფილა All Star-თან. ქართველმა ცენტრმა დემარკუს ქაზინს, დუაიტ ჰოვარდს და მის თანაგუნდელ დირკ ნოვიცკისაც კი გაუსწრო.
,,ჩვენ არ გვინდა ზაზა ფაჩულია All Star-ში დემარკუს ქაზინსზე წინ. ეს სიგიჟეა, ეს დემარკუს ქაზინსია, ლიგაში საუკეთესო! არ ვიცი, როგორ მოხვდა ფაჩულია მასზე წინ”, – გადაცემის მსვლელობისას თქვა ერთ-ერთმა წამყვანმა.
,,საერთოდ, რამდენია საქართველოს მოსახლეობა?” – იხუმრეს წამყვანებმა და დასძინეს, რომ ზაზას მთელი საქართველო უჭერს მხარს.
ამ გადაცემას გულშემატკივრების მხრიდან აღშფოთება მოჰყვა, რის შემდეგაც, Starters-ის წამყვანებმა ბოდიში მოიხადეს. მათ მაყურებელს NBA-ში ზაზა ფაჩულიას 5 საუკეთესო მომენტი შესთავაზეს.
ნატალია ჯალაღონია
