თბილისი ეუთოს საპარლამენტო ასამბლეის ყოველწლიურ სესიას უმასპინძლებს

დღეს, საქართველოს პარლამენტის თავმჯდომარემ, დავით უსუფაშვილმა და ეუთოს საპარლამენტო ასამბლეის პრეზიდენტის წარმომადგენელმა, ეუთოს საპარლამენტო ასამბლეის გენერალურმა მდივანმა, რობერტო მონტელამ სესიის თბილისში გამართვასთან დაკავშირებულ შეთანხმებას მოაწერეს ხელი. ხელმოწერის ცერემონიალის შემდეგ, დავით უსუფაშვილმა და რობერტო მონტელამ განცხადებები გააკეთეს. დავით უსუფაშვილის თქმით, საქართველოს 25-წლიანი დამოუკიდებლობის ისტორიაში, ეუთოს საპარლამენტო ასამბლეის 25-ე ყოველწლიური სესია იქნება ყველაზე მასშტაბური და მნიშვნელოვანი პოლიტიკური საერთაშორისო ღონისძიება. „თქვენ მოწმე იყავით ძალიან მნიშვნელოვანი მომენტის, არა მხოლოდ საქართველოს პარლამენტისთვის, არამედ საქართველოსთვის. ხელი მოეწერა მემორანდუმს საქართველოს პარლამენტსა და ეუთოს საპარლამენტო ასამბლეის პრეზიდენტს შორის, რომლითაც ჩვენ საბოლოოდ შევთანხმდით იმაზე, რომ მიმდინარე წლის 1-5 ივლისს საქართველოში შედგება ეუთოს საპარლამენტო ასამბლეის საზაფხულო სესია. საქართველოს 25-წლიანი დამოუკიდებლობის ისტორიაში ეს იქნება ყველაზე მასშტაბური და მნიშვნელოვანი პოლიტიკური საერთაშორისო ღონისძიება, რომელიც საქართველოში ჩატარდება“, – განაცხადა პარლამენტის თავმჯდომარემ.

მისივე თქმით, ღონისძიების მასპინძლობით, ქვეყანა ორგანიზაციის წინსვლაში წვლილს შეიტანს და საქართველოს საკითხების კიდევ უფრო წინ წამოწევის შესაძლებლობას გამოიყენებს. „ეუთოს საპარლამენტო ასამბლეის სესიას დაესწრება ეუთოს 57 წევრი ქვეყნის საპარლამენტო დელეგაციები. მოგეხსენებათ, ევროპის თანამშრომლობისა და უსაფრთხოების ორგანიზაცია არის ერთ-ერთი ყველაზე მასშტაბური და ყველაზე აქტიური ორგანიზაცია, რომელიც აერთიანებს არა მხოლოდ ევროპისა და აზიის სახელმწიფოებს, არამედ ამერიკის კონტინენტიდან წამყვან სახელმწიფოებს. ასე რომ ჩვენ, შესაძლებლობა გვექნება ვუმასპინძლოთ ამ მნიშვნელოვან ღონისძიებას, ვიყოთ მასპინძელი 57 ქვეყნის დელეგაციის და ამით ჩვენი წვლილი შევიტანოთ ორგანიზაციის წინსვლაში და განვითარებაში და ასევე გამოვიყენოთ ეს ღონისძიება ჩვენი, საქართველოს საკითხების, თემების კიდევ უფრო უკეთ წამოსაწევად. მოგეხსენებთ, უსაფრთხოება ქვეყნისთვის რჩება ნომერ პირველ პრობლემად და ეუთო არის ზუსტად ის ადგილი, ის მექანიზმი, ის ორგანიზაცია, რომელმაც ყველაზე მეტი უნდა გააკეთოს იმისთვის, რომ საქართველო, სამხრეთ კავკასია, ევროპა და მთელი მსოფლიო იყოს უსაფრთხოდ“, – განაცხადა დავით უსუფაშვილმა.

ღონისძიებისა და ხელმოწერილი მემორანდუმის შესახებ ისაუბრა ეუთოს საპარლამენტო ასამბლეის გენერალურმა მდივანმა, რობერტო მონტელამ და საქართველოს ხელისუფლებას ღონისძიების მასპინძლობისთვის მადლობა გადაუხადა. მისი განცხადებით, ყოველწლიური სესია ასამბლეის ყველაზე მნიშვნელოვანი ღონისძიებაა, სადაც ეუთოს სივრცეში არსებულ გამოწვევებს განიხილავენ.

„ესაა ღონისძიება, სადაც 57 ქვეყნის პარლამენტარები, რომლებიც ერთი მილიარდ ადამიანს წარმოადგენენ, ერთად იკრიბებიან და განიხილავენ ეუთოს სივრცეში არსებულ საკითხებს. ეუთოს სივრცეში ბევრი გამოწვევაა და თბილისი ის ადგილია, სადაც ყველას, ამ კანონმდებლებს, ექნებათ შესაძლებლობა, იმსჯელონ სამი მიმართულებით-უსაფრთხოების, პოლიტიკის, ეკონომიკისა და ადამიანის უფლებების საკითხებზე. სესიის ბოლოს ასამბლეა მიიღებს წლიური დეკლარაციას, რომელიც ეუთოს საპარლამენტო ასამბლეის შემდეგი სესიის თემას განსაზღვრავს“,- განაცხადა ეუთოს საპარლამენტო ასამბლეის პრეზიდენტის წარმომადგენელმა.

მისივე ინფორმაციით, ეუთოს საპარლამენტო ასამბლეის სამუშაო ჯგუფი საქართველოში მომავალ კვირას ჩამოვა და ყოველწლიური სესიის საორგანიზაციო საკითხებში ჩაერთვება. დღესვე, საქართველოს პარლამენტის თავმჯდომარემ, დავით უსუფაშვილმა და ეუთოს საპარლამენტო ასამბლეის 25-ე ყოველწლიური სესიის თბილისში გამართვასთან დაკავშირებული საორგანიზაციო კომისიის წევრებმა ეუთოს საპარლამენტო დელეგაციასთან შეხვედრა გამართეს. შეხვედრას, დავით უსუფაშვილთან ერთად, პარლამენტის წევრები: გიორგი ვოლსკი, ირაკლი სესიაშვილი, გიორგი წერეთელი, ვიქტორ დოლიძე და საქართველოს პარლამენტის აპარატის უფროსი ზურაბ მარაქველიძე ესწრებოდნენ. შეხვედრის დასრულების შემდეგ ეუთოს საპარლამენტო ასამბლეის ხელმძღვანელმა, კრისტიან ვიგენინმა მედიასთან კომენტარი გააკეთა და ეუთოს საპარლამენტო ასამბლეის ყოველწლიური სესიის მნიშვნელობის შესახებ ისაუბრა.

„გუშინ მაღალი დონის შეხვერები გვქონდა საქართველოს პრეზიდენტთან, პრემიერ-მინისტრთან და საგარეო საქმეთა მინისტრთან და რა თქმა უნდა, დღეს, გვქონდა შესანიშნავი შეხვედრა საქართველოს პარლამენტის ხელმძღვანელობასთან. ჩვენი ვიზიტის მიზანი, ძირითადად, ეუთოს საპარლამენტო ასამბლეის ყოველწლიური სესიის მომზადებაა, რომელიც თბილისში ივლისში ჩატარდება. ახლა, რამდენიმე წუთში, ხელი მოეწერება მემორანდუმს, რმელიც ამ შესანიშნავი ღონისძიების არა მხოლოდ პოლიტიკურ, არამედ ტექნიკურ მოსამზადებელ სამუშაოებს გახსნის. ეს იქნება მნიშვნელოვანი შესაძლებლობა საქართველოსთვის, რომ კიდევ ერთხელ აჩვენს დემოკრატიულ განვითარებაში მიღწეული პროგრესი, რომ აჩვენოს თავისი მნიშვნელობა საპარლამენტო ასამბლეაში, სადაც თქვენ ძალიან ძლიერი და აქტიური დელეგაცია გყავთ, რომელიც მნიშვნელოვან სამუშაოს ასრულებს ასამბლეაში“, – განაცხადა კრისტიან ვიგენინმა.

დელეგაციის ხელმძღვანელის განცხადებით, ეუთოს საპარლამენტო ასამბლეა საქართველოს ტერიტორიულ მთლიანობას მხარს უჭერს. მისივე თქმით, ასამბლეა გააგრძელებს საქართველოს ხელისუფლებისა და პოლიტიკური პარტიების მხარდაჭერას არჩევნების მომზადებასა და ჩატარებაში.

„ეუთოს საპარლამენტო ასამბლეა, როგორც გუშინ, ასევე დღეს, პარლამენტარებთან შეხვედრაზე, კიდევ ერთხელ გამოხატავს საქართველოს ტერიტორიული მთლიანობისადმი მხარდაჭერას. იმ სამუშაოსთან ერთად, რომელსაც ჩვენ ამ საკითხებთან დაკავშირებით ვახორციელებთ, საპარლამენტო ასამბლეა გააგრძელებს საქართველოს ხელისუფლებისა და პოლიტიკური პარტიების დახმარებას არჩევნების მომზადებასა და ჩატარებაში. ჩვენ მოვისმინეთ გუშინ პოლიტიკური ლიდერების ამბიცია, რომ გაგრძელდეს პოზიტიური ტენდენცია და ყოველი მომდევნო არჩევნები წინაზე უკეთესი იყოს. ასე რომ, ჩვენ არა მხოლოდ დავაკვირდებით ამ ტრენდს, ასევე, დავეხმარებით ქვეყანას, რომ მოამზადოს და ჩაატაროს არჩევნები მაქსიმალურად საუკეთესოდ და დარწმუნებული ვარ, რომ ტესტს დემოკრატიის განვითარებაში საქართველო საუკეთესოდ ჩააბარებს“, – განაცხადა კრისტიან ვიგენინმა.

კრისტიან ვიგენინი ეუთოში ბულგარეთის დელეგაციის ხელმძღვანელის მოადგილეა. ეუთოს საპარლამენტო ასამბლეის დელეგაციის ვიზიტი საქართველოში 26 იანვარს დაიწყო. დელეგაციის წევრებმა შეხვედრები საქართველოს პრეზიდენტთან, გიორგი მარგველაშვილთან, პრემიერმინისტრ გიორგი კვირიკაშვილთან და საგარეო საქმეთა მინისტრ მიხეილ ჯანელიძესთან გამართეს.