ტელეკომპანია “მაესტროს” მეწილის, მაკა ასათიანის ადვოკატ გიორგი გვენეტაძის განცხადებით, ბათილად უნდა იქნას ცნობილი გარიგება, რომლის თანახმადაც, გიორგი გაჩეჩილაძემ ტელეკომპანიის 30% წილი იყიდა.როგორც გვენეტაძემ “მაესტროში” გამართულ ბრიფინგზე განაცხადა, აღნიშნული გარიგებით, ადგილი აქვს, კონკურენციასთან დაკავშირებით, საქართველოს კანონის დარღევას.
“ამ მტკიცებულებების საფუძველზე სრულიად აშკარად მტკიცდება, რომ ბატონმა გიორგი გაჩეჩილაძემ, ირაკლი რუხაძესთან დაკავშირებით, საჯაროდ გაკეთებული განცხადებების გათვალისწინებით, შპს “მაესტროს” 30%-იანი წილი შეიძინა და კომპანიის დომინანტი პარტნიორი რეალურად გახდა არა გიორგი გაჩეჩილაძე, არამედ ბატონი ირაკლი რუხაძე. საყოველთაოდ ცნობილია, რომ ბატონი რუხაძე პირდაპირ არის დაკავშირებული ტელეკომპანია “იმედთან” და მის მართვასთან. შესაბამისად, ადგილი აქვს კონკურენციასთან დაკავშირებით საქართველოს კანონის დარღევვას. მოხდა ეკონომიკურ აგენტზე, შპს “სტუდია მაესტროზე” კონტროლის მოპოვება პირის მიერ, რომელიც უკვე აკონტროლებს კონკურენტ ეკონომიკურ აგენტს, ტელეკომპანია “იმედს”. ადგილი აქვს სამაუწყებლო სფეროში დომინირებული ადგილის მოპოვების მცდელობას. კანონის თანახმად, კონკურენციის სააგენტომ უნდა დაიწყოს საკითხის მოკვლევა, მოამზადოს დასკვნა კონკურენტული ეფექტის შესახებ და მოახდინოს შესაბამისი შეფასებები და რეაგირება. მაუწყებლობის შესახებ საქართველოს კანონის მეორე მუხლის თანახმად, ადგილი აქვს ურთიერთდამოკიდებულებას. “ტელეიმედი” ირიბად ფლობს “მაესტროს” საწესდებო კაპიტალის წილს. ამ კუთხით, ვთხოვთ რეაგირებას კომუნიკაციების ეროვნულ კომისიას. გარდა ამისა, ზემოთ მითითებული ფაქტი იძლევა საფუძველს იმისათვის, რომ ბათილად იქნეს ცნობილი გარიგებები, რომლითაც ლევან ჩიკვაიძის და გიორგი ებრალიძისგან გიორგი გაჩეჩილაძემ შეისყიდა “სტუდია მაესტროს” წილები. საქართველოს სამოქალაქო კოდექსის 54-ე და 56-ე მუხლების თანახმად, ეს გარიგებები უნდა შეფასდეს, როგორც “თვალთმაქცური”, “მართლსაწინააღმდეგო” გარიგებები. ჩვენ მოვახდენთ შესაბამის რეაგირებას, იმისთვის, რომ არ დავუშვათ “მაესტროს” გადაქცევა “იმედის” ფილიალად”, – განაცხადა გვენეტაძემ.
