საქართველოსა და ირლანდიას შორის დიპლომატიური ურთიერთობების დამყარების 20 წელი, ხოლო თბილისისა და დუბლინის დამეგობრების 2 წელი აღინიშნება.
როგორც “თბილისი თაიმსს” კულტურუს სამინისტროდან აცნობეს, საიუბილეო თარიღებთან დაკავშირებით, “Tbilisi Event Hall’’-ში, 20:00 საათზე, ცნობილი ირლანდიური და ქართული ჯგუფების – “Jack Lukeman”-ის და “ნიუტონის” ერთობლივი კონცერტი გაიმართება. ირლანდიური ჯგუფი საქართველოს პირველად ეწვევა, ქართველ მსმენელს ცნობილ მუსიკალურ ნაწარმოებებს შესთავაზებს და ირლანდიურ კულტურას გააცნობს. ორი ქვეყნის მეგობრობის საიუბილეო საღამოსთან ერთად აღინიშნება ირლანდიის ეროვნული დღესასწაულიც, რომელსაც მსოფლიოსთან ერთად თბილისიც აღნიშნავს – მსოფლიო კამპანიის “Global Greening” ფარგლებში თბილისის ანძა მწვანედ განათდება.
საღამო იმართება კომპანია „ჯორჯიან ივენთსის“ ორგანიზებით, საქართველოს კულტურისა და ძეგლთა დაცვის სამინისტროს, საქართველოს საგარეო საქმეთა სამინისტროსა და თბილისის მერიის კულტურული ღონისძიებების ცენტრის მხარდაჭერით. პროექტის საინფორმაციო პარტნიორია „რადიო იმედი“. ღონისძიების სპონსორია კომპანია „ნატახტარი“.
