“საუკუნოითგან დამალული საიდუმლო” განცხადდა დღეს მთავარანგელოზ გაბრიელის მოკითხვით ქალწულ მარიამისადმი. საიდუმლო, რომელსაც მთელი ძველი აღთქმის ეპოქა მოელოდა ადამიანთა მოდგმა, ეს იყო მესია-გამომხსნელი სიკვდილისა და ცოდვის ტყვეობისგან. სწორედ ყოვლადწმინდა ღვთისმშობლის ხარების დღესასწაულით გვეხარა უფლის ამქვეყნად მოსვლა, გაგვეღო სასუფევლის კარი, მოგვეცა ღმერთთან თანაცხოვრების, უფალთან ჩვენი მარადიული კავშირის მოპოვების შესაძლებლობა.
“გიხაროდენ, მიმადლებულო, უფალი შენთანა“. რა საოცარი სიტყვებია! საერთოდ, ეს მიმართვა – „გიხაროდენ“, – მომდინარეობს ძველი ებრაული მისალმების ტრადიციიდან. მისალებისას ქართველები ერთმანეთს გამარჯვებას ვუსურვებთ. ებრაელები კი ერთმანეთს ეუბნებიან – „გიხაროდენ“. სწორედ ამ მისალმებით მიმართა მთავარანგელოზმა გაბრიელმა ღვთისმშობელს: „გიხაროდენ, მიმადლებულო“; „მიმადლებულო“, ე.ი. მადლმოსილო, მადლით შემკულო, მადლით აღვსილო. შედეგი ამ მადლისა კი არის წმიდა მთავარანგელოზის სიტყვები: „უფალი შენთანა“. ერთი ღირსი მამა ამბობდა, ბედნიერია ადამიანი, ვისთანაც მყოფობს უფალი. ბედნიერია ისიც, ვინც მოიპოვებს მადლის თუნდაც სულ მცირე ნაწილს, რადგან მადლი მრავლდება და გარშემო განეფინება, რაც აცხოვნებს მასაც და მის გარშემო ათასობით ადამიანსაც. დღეს ისეთი დღესასწაულია, რომ ყოველი ჩვენგანი მახარებელი უნდა იყოს, თუმცა მარტო დღეს კი არა, საერთოდ მთელი ჩვენი ცხოვრების მანძილზე; ჩვენ აუცილებლად ყოველდღე რაღაც სიხარული უნდა მოვუტანოთ სხვას, თუ საქმით არა, სიტყვით მაინც, რაც დღეს განსაკუთრებით საჭიროა. სადაც არის რწმენა და სიყვარული – იქ არის სიხარული. თუ ადამიანში არის სიხარული, მაშინ ის ამ გრძნობის გამცემია.”- ამონარიდი უწმიდესი და უნეტარესი სრულიად საქართველოს კათოლიკოს-პატრიარქი ილია მეორის ქადაგებიდან 2001 წ. 7 აპრილი.
სოფიკო ნინიკაშვილი
