გარემოს ეროვნული სააგენტოს უფროსმა თამარ ბაგრატიამ თბილისის მუნიციპალიტეტის საკრებულოს თავმჯდომარეს და საკრებულოს გარემოს დაცვის კომისიის წევრებს თბილისში გარემოს (ატმოსფერული ჰაერი, ნიადაგი და ზედაპირული წყლები) დაბინძურების მონიტორინგის შედეგები გააცნო.
შეხვედრაზე სააგენტოს ხელმძღვანელმა საკრებულოს დეპუტატებს გარემოს ეროვნული სააგენტოს მიერ 2015 წელს ჩატარებული კვლევების შედეგები წარუდგინა.
კვლევები მიზნად ისახავს თბილისის მასშტაბით ატმოსფერული ჰაერის, ზედაპირული წყლების, ნიადაგის და რადიაციული ფონის განსაზღვრას და დაბინძურების დონის დადგენას.
გარემოს ეროვნული სააგენტო, ატმოსფერული ჰაერის, წყლისა და ნიადაგის დაბინძურების მონიტორინგის გაუმჯობესების მიზნით, საქართველოს მაშტაბით ინდიკატორული გაზომვების წერტილების გაზრდას გეგმავს, ასევე აშენდება გარემოს დაბინძურების კვლევის ლაბორატორიული კორპუსი და მოხდება ჰაერის მონიტორინგის არაავტომატური სადგურების თანამედროვე ავტომატური ხელსაწყოებით გადაიარაღებაც.
სააგენტოს უფროსი გარემოს დაბინძურების მონიტორინგის შედეგებს საქართველოს სხვადასხვა რეგიონებში თვითმმართველობის წარმომადგენლებსაც გააცნობს.
