სრულიად საქართველოს მუსლიმთა უმაღლესი სასულიერო სამმართველო, რომელიც შექმნილია საქართველოს შიიტი მუსლიმი მოქალაქეების მიერ საკონსტიტუციო სასამართლოში ასაჩივრებს მთავრობის 2014 წლის 27 იანვრის დადგენილებას, რომელიც სახელმწიფო ბიუჯეტიდან ანაზღაურების მისაღებად რელიგიურ გაერთიანებას ავალდებულებს, შექმნას წარმომადგენლობითი საბჭო. მოსარჩელე მხარე მიიჩნევს, რომ შიიტებისა და სუნიტების ერთ საბჭოში გაერთიანება დისკრიმინაციულია.
დოკუმნეტის მიხედვით, თუ რელიგიური გაერთიანების ან აღმსარებლობის სახელით დარეგისტრირებულია ერთზე მეტი რელიგიური გაერთიანება მათ ერთი საჯარო სამართლის იურიდიული პირი ან წარმომადგენლობითი საბჭო უნდა შექმნან. ამ მოთხოვნის დაუკმაყოფილებლობის შემთხვევაში რელიგიური ჯგუფი კარგავს სახელმწიფო ბიუჯეტიდან დაფინანსების მიღების შესაძლებლობას. საქართველოს ახალგაზრდა იურისტთა ასოციაციაში, რომელიც მუსლიმთა უმაღლესი სასულიერო სამმართველოს ინტერესებს იცავს მიაჩნიათ, რომ აღნიშნული მოთხოვნა დისკრიმინაციულია და წარმოადგენს რწმენის და გაერთიანების თავისუფლების დარღვევას.
“მეშვიდე საუკუნიდან გაყოფილი ორი მუსლიმური მიმდინარეობისათვის ერთ ორგანიზაციაში გაერთიანების მოთხოვნა და ამ მოთხოვნის შეუსრულებლობის გამო დაფინანსებაზე უარის თქმა, წარმოადგენს რწმენის და გაერთიანების თავისუფლების დარღვევას. საქართველოს კონსტიტუციის 26-ე მუხლის პირველი პუნქტით აღიარებულია გაერთიანების თავისუფლება, ხოლო კონსტიტუციის მე-19 მუხლით რწმენის თავისუფლება. ეს ორი კონსტიტუციური დებულება იცავს ადამიანის უფლებას, იძულებით არ გაერთიანდეს საწინააღმდეგო მრწამსის მქონე ჯგუფთან…. ქრისტიანულ ჯგუფებთან შედარებით, მუსლიმური ჯგუფის მიმართ ადგილი აქვს კონსტიტუციის მე-14 მუხლით აკრძალულ დისკრიმინაციულ მოპყრობას. მთავრობის დადგენილება არ ავალდებულებს დაფინანსების მისაღებად სომხურ და კათოლიკურ ეკლესიებს ერთი საჯარო სამართლის იურიდიული პირის შექმნას, მაშინ როდესაც სომხური და კათოლიკური ეკლესია ისეთივე სქიზმაში (განხეთქილებაში) იმყოფებიან ერთმანეთთან, როგორც შიიტები და სუნიტები. სომხურ და კათოლიკურ ეკლესიას გაერთიანების გარეშე შეუძლია დაფინანსების მიღება, მაშინ როცა სუნიტებმა და შიიტებმა საერთო საჯარო სამართლის იურიდიული პირი ან წარმომადგენლობითი საბჭო უნდა შექმნან.”- ნათქვამია საიას მიერ გაოქვეყნებულ განცხადებაში.
“ისლამური მიმართულებების ერთი ისლამით მოხსენიება ქმნის რთულ ვითარებას, რამეთუ ვერ განარჩევს ერთმანეთისაგან ამ მიმდინარეობებს. შიიტებისა და სუნიტების ერთი სამმართველოთი წარმოდეგნა ანორმალური და დისკრიმინაციული თავისთავად. ჩვენ გვინდა რომ სახელმწიფოსთან ვიურთიერთოთ მუსლიმი შიიტური თემის სახელით.”-აღნიშნავს “პირველი არხისთვის” მიცემულ ინტერვიუში საქართველოს მუსლიმთა უმაღლესი სასულიერო სამმართველო თავმჯდომარე მირტაგი ასადოვი.
მუსლიმების დაყოფას კატეგორიულად ეწინააღმდეგებიან სრულიად საქართველოს მუსლიმთა სამმართველოში და შიიტებისაა და სუნიტების ერთ ორგანიზაციაში ყოფნის აუცილებლობაზე საუბრობენ. მუსლიმთა სამმართველო საიას სარჩელთან დაკავშირებით სპეციალურ განცხადებას აქვეყნებენ, რომელსაც “თბილისი თაიმსი” უცვლელად გათავაზობთ: “სრულიად საქართველოს მუსლიმთა სამმართველო არის ერთადერთი ორგანიზაცია, რომელიც წარმოადგენს საქართველოს ყველა რაიონში მცხოვრებ მუსლიმებს, როგორც ეთნიკური ასევე რელიგიური მიმდინარეობის მიხედვით. აღსანიშნავია, რომ სხვა მუსლიმურ ორგანიზაციებში დამფუძნებლები და რელიგიური საბჭოს წევრები არ არიან როგორც რეგიონების და რელიგიური შიდა მიმდინარეობების, ასევე ყველა ეთნიკური მუსლიმების წარმომადგენლებით დაკომპლექტებული. აქედან გამომდინარე, სრულიად საქართველოს მუსლიმთა სამმართველო მუსლიმურ ორგანიზაციებში დომინანტი ორგანიზაციაა.
ეხლა განგიმარტავთ შიიტების და სუნიტების ერთ ორგანიზაციაში ყოფნის აუცილებლობას:
- საქართველოს და კავკასიის ისტორიას თუ გადავხედავთ, 1823 წლიდან დღემდე მუსლიმების ოფიციალური წარმომადგენელი ორგანიზაცია არის ერთი. მუსლიმები ძმურად და მეგობრულად თანაცხოვრობდნენ ყოველთვის.
- საქართველოში მოქმედი მუსლიმური სსიპ–ები არც წესდებით და არც დასახელებით არ წარმოადგენს ან შიიტურ, ან კიდევ სუნიტურ ორგანიზაციას, ყველა სრულიად საქართველოს მუსლიმების სახელით არის რეგისტრირებული. აქედან გამომდინარე, ლოგიკურია, რომ ყველას თავიდან ჰქონდა გაცნობიერებული, რომ მუსლიმების დაყოფა არ არის სწორი.
- საქართველოში შიიტი მუსლიმები არიან მხოლოდ ეთნიკურად აზერბაიჯანელები. ასევე, ეთნიკურად აზერბაიჯანელების ნაწილი არიან სუნიტი მუსლიმები. ერთი ეთნოსის რელიგიური ნიშნით დაყოფა იმას ნიშნავს, რომ ერთი და იგივე ეთნოსი ორ ნაწილად გაყო. ეთნიკურად აზერბაიჯანელებში რეფერენდუმიც რომ ჩავატაროთ, ხმათა უმრავლესობით მივიღებთ იმ შედეგს, რომ ისინი ერთობის მომხრენი არიან. ასევე აღვნიშნავთ, რომ აზერბაიჯანელ მუსლიმებში ტერმინ „შიიტსა“ და „სუნიტზე“ სიძულვილი აქვთ და ამის გაგონებაც არ სურთ, აქ მათ ორად დაყოფაზე საუბარიც კი ზედმეტია.
- მსოფლიოს არც ერთ ქვეყანაში ჩვენ არ გვინახია ისეთი მუსლიმური ორგანიზაციები რომლებიც წარმოადგენენ ან შიიტურს ან სუნიტურს და თანაბარი იურიდიული სტატუსი ჰქონდეს. არც არაბულ და არც შუა აზიის ქვეყნებში მსგავს ორგანიზაციებს ვერ ვნახავთ. ამიტომაც საქართველოს ისტორიაში არ არსებული ფაქტის ახლად დანერგვა და მუსლიმების დაყოფა, მრავალეთნიკურ და მრავალკონფესიურ საქართველოში რელიგიურ ნიადაგზე შუღლის გაღვივების და დაპირისპირების დაწყების მიზეზად იქცევა. ამის ფაქტებია ბოლო დროს ახლო აღმოსავლეთშიორ მუსლიმურ მიმდინარეობას შორის ხელოვნურად დაპირისპირების გაღვივებით მიღებული შედეგები.
ბოლოს გვინდა აღვნიშნოთ, რომ რელიგია არის ძალზედ ფაქიზი თემა, რელიგიურ სფეროში რაიმე გადაწყვეტილების მიღებისას, სასულიერო პირების, მორწმუნეების და მრევლის აზრია მნიშვნელოვანი. საქართველოში მცხოვრები მუსლიმი თემი, არსებული მდგომარეობით თუ კმაყოფილი არიან, აქ უკვე რაიმე დისკრიმინაციაზე საუბარი ზედმეტია. ჩვენ უფლებადამცველ არასამთავრობო ორგანიზაციებს მოვუწოდებთ, რომ მსოფლიოსათვის სანიმუშო მოდელის დაცვის, მისალმების და მაგალითად გამოჩენის ნაცვლად, დაპირისპირების, ერთმანეთში განხეთქილების და გაუცხოების გაღვივების მცდელობა არასწორად მიგვაჩნია.”- სრულიად საქართველოს მუსლიმთა სამმართველო.
სოფიკო ნინიკაშვილი
