იაშვილის კლინიკაში ბავშვის გარდაცვალების მიზეზს ექიმთა საქმიანობის რეგულირების სააგენტო უკვე სწავლობს. განცხადება ამის შესახებ ჯანდაცვის სამინისტროში გაკეთდა.
საქართველოს შრომის, ჯანმრთელობისა და სოციალური დაცვის მინისტრის პირველი მოადგილის დიმიტრი მახათაძის განცხადებით, თვითანგარიშწორება დაუშვებელია და ეს კრიმინალია.
„თვითანგარიშწორების წარმოება კრიმინალია, არსებობს ცივილიზებული გზა იმისა, რომ გაირკვეს რეალური მიზეზი დაავადების მიმდინარეობისა, ასევე სამწუხარო ფაქტის – ბავშვის გარდაცვალებისა, ამისთვის არსებობს შესაბამისი სამსახურები, გარდაცვლილი პაციენტის მშობლების განცხადების საფუძველზე კვლევა დაწყებულია“,- განაცხადა მინისტრის მოადგილემ.
წლინახევრის დავით ვეფხვაძე იაშვილის სახელობის კლინიკაში 25 აპრილს გარდაიცვალა. წინასწარი ინფრომაციით, გარდაცვალების მიზეზი მწვავე რესპირატორული დაავადება გახდა. კლინიკის ექიმების ცნობით, გარდაცვლილი ბავშვის ბაბუა გუშინ საავამდყოფოში მივიდა და ექიმ გვეტაძეს ფიზიკურად გაუსწორდა.
29.04.14
