საქართველოს გაეროს განვითარების პროგრამის (UNDP) მიერ დაფინანსებული პროექტი სახელმწიფო სერვისების განვითარების სააგენტოს ინიციატივით, სადახლოსა და ფოკის მოსახლეობისთვის ქართული ენის შემსწავლელი კურსები მიმდინარეობდა 2-დან 24 აპრილის ჩათვლით. კურსებს იუსტიციის სასწავლო ცენტრის ტრენერები უძღვებოდნენ.
ქართული ენის შემსწავლელი კურსები ეთნიკური უმცირესობებისათვის იუსტიციის მინისტრის ინიციატივით დაიწყო. კურსების მიზანია, ხელი შეუწყოს საქართველოს ეთნიკურად არაქართველ მოქალაქეებს, უკეთ დაეუფლონ სახელმწიფო ენას, რაც მათ დაეხმარება, მიიღონ განათლება ქართულ ენაზე, უკეთ გაეცნონ ქართულ ლიტერატურას, ისტორიას, კულტურას, დასაქმდნენ საქართველოში და თავი ქვეყნის სრულფასოვან მოქალაქეებად იგრძნონ.
კურსები, რა თქმა უნდა, სრულიად უფასო იყო. პროგრამაში მონაწილეობა მიიღო 43-მა ეთნიკური უმცირესობის წარმომადგენელმა. მათში შედიოდნენ როგორც სკოლის მოსწავლეები, ასევე, შედარებით ზრდასრული ადამიანები.
ამ პროგრამას ერთჯერადი სახე არ ჰქონია. სერვისების განვითარების სააგენტოს ინიციატივით, ქართული ენის შემსწავლელი კურსები ეთნიკური უმცირესობებით დასახლებულ სოფლებში ყვარელწყალის (დუისი), სართიჭალის, კაბალისა და ფოკის საზოგადოებრივ ცენტრებში ადრეც ჩატარდა და, აღსანიშნავია, რომ მსგავსი პროგრამების გამეორება კვლავ იგეგმება.
პროგრამის დასრულების ბოლოს, მონაწილეებს გადაეცათ სერთიფიკატები.
მარიამ ტაკაშვილი
