„ეს არ არის მსოფლიო ისტორიული მოვლენა,რომ თბილისის მერი მოვიდა საკრებულოში.მას ევალება ანგარიში წარმოადგინოს. რამდენჯერაც დავიბარებთ, იმდენჯერ უნდა მოვიდეს. ამაში უპრეცენდენტო არაფერია“. თბილისის საკრებულოს თავისუფალმა დეპუტატმა ალეკო ელისაშვილმა დავით ნარმანიას საკრებულოში შეხვედრის შესახებ „პალიტრანიუს“-ზე, გადაცემა „360 გრადუსის“ ეთერში ისაუბრა.
„ბევრი არც არაფერი იყო მოსალოდნელი. თუმცა მაინც მაინტერესებდა, იქნებ გამბედაობა გაღვიძებოდა და ეთქვა, რომ აუქციონი გაგვეუქმებინა. მისი გამოსვლა იყო უმწეო. ძირითადად ეჩხუბებოდა „ნაციონალურ მოძრაობას“. თუმცა მას მხოლოდ ეს პოლიტიკური ძალა არ აკრიტიკებს. მე, ირაკლი ლექვინაძე და დავით ნარმანია თავის დროზე ერთად ვაკრიტიკებდით ერთი ადამიანის ხუშტურებზე სიარულს. რაც მაშინ იყო მიუღებელი, ახლაც მიუღებელია. რეალურად დავით ნარმანია არ არის თბილისის მერი. მან თქვა დეკემბერში მოვალო და 2 დღეში გამოცხადდა“.
ალეკო ელისაშვილმა თბილისის მერიაში მიმდინარე შესაძლო კორუფციულ გარიგებებზეც ისაუბრა.
„ „ნაციონალური მოძრაობის“ დროს საკნდალურ ტენდერებში მონაწილე ხვიჩა მაქაცარიას კომპანიამ შესაძლოა ახლაც გაიმარჯვოს. მას ჰქონდა მონოპოლია მიკროავტობუსებზე. ახლა ჩამოჰყავთ 150 ყველაზე უხარისხო, პოლონური ავტობუსი. ტენდერში გასულია 3 კომპანია და მათგან ერთ-ერთი ხვიჩა მაქაცარიაა, ჩემი ინფორმაციით სწორედ ის გახდება გამარჯვებული.
„კა- 2“ კოეფიციენტის გაცემა ხდებოდა უნებართვოდ. დავით ნარმანია არის დეველოპერების მძევალი. ქეჩოში მოჰკიდეს ხელი და აშენებენ მაღალსართულიან შენობებს იქ, სადაც სასამართლომ უკვე მიიღო ნებართვის გაუქმების გადაწყვეტილება“.
მანანა ღოღობერიძე
