„გადაბრალებით საქმე არ კეთდება. დღეს მართლა გამოუვალი მდგომარეობაა და აუცილებელი იყო ახალი პოლიტიკური ძალის შექმნა“. ამის შესახებ პარტია „სახელმწიფო ხალხისთვის“ ლიდერმა პაატა ბურჭულაძემ ტელეკომპანია „იმედზე“, გადაცემა „ქრონიკის სტუდიაში“ ისაუბრა.
„მე ვეყრდნობი ჩემს გამოცდილებას. ვეყრდნობი იმას, რისიც მჯერა. ყოველთვის გამომდიოდა ის საქმე, რისიც მჯეროდა. მე ვენდობი ჩემს გამოცდილ და პატრიოტ გუნდს. ყველა ის სიტყვა, რომელიც მე ვთქვი, გამართლდება.
მე პოლიტიკაში ვარ ბოლო 25 წლის განმავლობაში. ყოველთვის გვერდში ვედექი პოლიტიკოსებს, მქონდა ურთიერთობა და ვეხმარებოდი მათ კარგი საქმეების კეთებაში. შეიძლება ხმამაღალი განცხადებები არ გამეკეთებინა, მაგრამ ვერავინ გაიხსენებს, რომ შეიძლება ხმამაღლა მექო მთავრობა. ის 9 წელი მე არასდროს მითქვამს ვაშა ამ მთავრობას.
ჩვენი გამოკითხვებით, გავდივართ უმრავლესობით. ილაპარაკონ, თავიდან ამბობდნენ,რომ ვიყავი „რუსი ბანი“, პუტინის პროექტი, ახლა სააკაშვილის სატელიტს მიწოდებენ, ესეც ჩაივლის. ყველაფერი გამოჩნდება საქმეში. მე როცა გავიმარჯვებ, არ გავხდები აპოლიტიკური უცებ, გავუძღვები ამ საქმეს ბოლომდე.
მე არავის დაშინებას არ ვაპირებ, უბრალოდ მოვუწოდებ რეალობა გაითვალისწინონ. ჩვენ ვართ ერთადერთი ძალა, რომელსაც შეუძლია შეცვალოს კეთილდღეობისკენ ქვეყანა. აქ არ არის ბრძოლა, შურისძიება, აქ არის სამშობლოს სიყვარული და ხალხის სიცოცხლე. ხალხი არ ცხოვრობს, ისინი არსებობენ. მე ეს მაღელვებს, თორემ სულ არ მინდოდა ჩემი სახით კიდევ ერთი პოლიტიკოსი შემატებოდა საქართველოს. მე დღეს კონკურენტი საქართველოში არ მყავს. ცდილობენ შავი პიარით იმოქმედონ ხალხზე,“ – განაცხადა პაატა ბურჭულაძემ.
მანანა ღოღობერიძე
