„დღეს, მთელი მედია დროს ამ დოკუმენტის ანალიზს ანდომებს. ამ წერილში ივანიშვილი ცდილობს ლოგიკით ესაუბროს მკითხველს და არა ლოზუნგებით. ყველაზე მეტად ეს მომეწონა. საინტერესო და სასიამოვნოა, რომ იკითხება როგორც მაღალი დონის პუბლიცისტიკა“. ბიძინა ივანიშვილის მიერ გამოქვეყნებული წერილის დეტალები პოლიტიკის ექსპერტმა რამაზ საყვარელიძემ ტელეკომპანია „GDS”-ზე, გადაცემა „2030“–ის ეთერში შეაფასა.
„ივანიშვილის მიმართ ინტერესი ყოველთვის დიდია, მითუმეტეს მაშინ, როდესაც ანგარიშის გაკეთება და მომავალი საარჩევნო სტრატეგიის საზოგადოებისთვის წარდგენაა დაანონსებული. ეს წერილი ერთ–ერთი ყველაზე სანტერესო დოკუმენტია, რაც მე მახსოვს პოლიტიკაში. აქ ძალიან ბევრი ღრმა პასაჟია ზუსტად ისეთი, პოლიტიკოსებს, რომ არ სჩვევიათ. ტექსტი თავისუფალია შაბლონებისგან, ბატონი ბიძინა ცდილობს ყველაფრის არგუმენტაციას, სტილისტურად კარგად შეკრული ტექსტია. საკითხებს შორის გადასვლა და კავშირი ლოგიკურია.
მისასალმებელია ის რეალისტური ინტონაცია, რაც თავის წერილში შემოიტანა. არ დაიწყო დაპირება, რომ ხვალ გავწევრიანდებით „ნატო“–ში. ბიძინა ივანიშვილს კარგად ესმის, რომ ეს რთული საკითხია და როგორც კი პარტნიორები მზად იქნებიან კარის გასაღებაად, ეს მოხდება. სასურველია ეს ინტონაცია შენარჩუნდეს. ეს წერილი არ ჰგავს პოლიტიკოსის ნაწერს, თითქოს ივანიშვილი ისტორიული სიღრმიდან მოვიდა.
რაც შეეხება პოლიტიკურ სტრატეგიას, ფაქტია, რომ ივანიშვილმა არ დაიწყო ოპონენტების გადათვლა, მათთან დავა. გამოყო მხოლოდ ერთი პოლიტიკური ჯგუფი „ნაციონალური მოძრაობა“ და საქართველოს მოსახლეობას განუცხადა, რომ ამ ჯგუფის დაბრუნება ხელისუფლებაში დაუშვებელია, მათი მძიმე კრიმინალური წარსულის გამო. კორცხელის ინციდენტი საკვანძო ინციდენტი იყო. ამ ფაქტმა „ნაციონალური მოძრაობა“ თითქოს მსხვერპლად გამოიყვანა, მაგრამ თვალსაჩინო გახადა, რომ ეს მოძრაობა მსხვერპლად ყოფნაზეც მიდის და თავდაუზოგავად იბრძვის ხელისუფლებაში მოსვლისთვის. ისინი შეიძლება შემობრუნდნენ პოლიტიკაში, ეს რეალობა იგრძნო ივანიშვილმა და ალბათ ეს იყო ამ წერილის დაწერის და წარსულის განხლვის მიზეზი.
სასურველია მეტი ყურადღება დაუთმოს იმას, თუ რა ვერ შეძლო „ქართულმა ოცნებამ“. კრიტიკა არ უნდა იყოს მიჩუმათებული, ჯობს თავად ახსნას კრიზისი და დასახოს გამოსავალი. მაგალითად ბიძინა ივანიშვილი პოზიტიურად აფასებს გიორგი კვირიკაშვილის შემოსვლას პოლიტიკაში და ამით ხსნის კრიზისიდან გამოსავალს,“ – განაცხადა რამაზ საყვარელიძემ.
მანანა ღოღობერიძე
