“მაესტროს” გადაცემების “ბიზნესკონტაქტის” და “საქმიანი დილის” ავტორის გიორგი ისაკაძის განცხადებით, მისთვის სამსახურიდან გათავისუფლების შესახებ განცხადება სიახლე არ ყოფილა.
მისი თქმით, მიღებული წერილი, რომელიც ელექტრონულ ფოსტაზე “მაესტროს” დირექტორისგან მოუვიდა, სიურპრიზი არ ყოფილა, რადგან ზურაბ ნაყეურთან შეხვედრა წინა დღეს ჰქონდა.
“მას შემდეგ, რაც მან დამატებითი კონსულტაციები გაიარა კომპანიის დამფუძნებლებთან, მითხრა, რომ მათ არ სურთ ჩემთან თანამშრომლობის გაგრძელება. საუბარია აქციონერების 80%-ზე, “თავადაც მითხრა, რომ ამ ტიპის გადაწყვეტილებებში მონაწილეობას არ იღებენ “მაესტროს” ძველი დამფუძნებლები. ვგულისხმობ მამუკა ღლონტს, ეკატერინე აკობიას და თუ არ ვცდები, ილია კიკაბიძეც არის აქციონერი”, – განაცხადა ისაკაძემ “მაესტროს” პირდაპირ ეთერში.
მისი თქმით, როდესაც “მაესტროს” გაკოტრების საქმე მიმდინარეობდა, ის მესამე, თუ მეოთხე ირიცხებოდა კრედიტორთა სიაში, როდესაც კომერციულ დირექტორად მუშაობდა.
“მაშინ კომპანიას გაუთვალისწინებელი სიტუაცია შეექმნა. საშიშროება არსებობდა, რომ დაახლეობით, 180 ათასიდან, 200 ათას ლარამდე ყადაღა დაედებოდა, რადგან გარკვეული აპარატურა შემოდიოდა. შევეცადე ეს პრობლემა, ცხადია დამფუძნებლებთან კონსულტაციით აღმომეფხვრა, პირადად ავიღე “ოვერდრაფტი” ერთ-ერთი კომერციული ბანკიდან და ამიტომ მოხდა ჩემი, როგორც კრედიტორად დაფიქსირება. დღეს ეს დავალიანება სრულად არის დაფარული. ამ მიმოწერაში, რაც გადმომეგზავნა, გარდა ამ საკითხისა, კიდევ ორი თემაა. ერთი ეხება “მაესტროს” თანამშრომლებისათვის წლის ბოლოსთვის მაინც შესაძლო ხელფასების მატებას 20%-ით, თუმცა მივიღე პასუხი, რომ ეს ვერ მოხდებოდა და აბსოლუტურად გაგებით მოვეკიდეთ მეც და გუნდიც”, – აღნიშნა ისაკაძემ.
მესამე თემა, ისაკაძის თქმით, მის მიერ შექმნილი გადაცემების “აუთსორსზე“ გასვლის მოთხოვნა იყო, რომელიც ასევე გავლილი თემა იყო და დირექტორმა ამის შესახებ იცოდა.
როგორც ისაკაძემ განაცხადა, აღნიშნულთან დაკავშირებით, აუცილებლად გაიმართება სასამართლო პროცესი.
