პარტია „ქართული ოცნება-დემოკრატიული საქართველოს“ საარჩევნო შტაბს კახა კალაძე უხელმძღვანელებს

გიორგი კვირიკაშვილმა იმედი გამოთქვა, რომ კახა კალაძე, რომელმაც საქმით დაამტკიცა, რომ აქვს ორგანიზატორული ნიჭი, წარმატებით უხელმძღვანელებს წინასაარჩევნო პროცესს.

„კახიმ არაერთხელ დაამტკიცა, რომ მას გააჩნია ძალიან კარგი ორგანიზატორული ნიჭი, მენეჯერული თვისებები და აქვს გამოცდილება, რომელიც ძალიან მნიშვნელოვანი იქნება ჩვენი პარტიისთვის წინასაარჩევნო პერიოდის ღირსეულად ჩატარებისთვის და გამარჯვების მოსაპოვებლად. კახი კალაძის გამორჩეული კაპიტნის თვისებები ნამდვილად ძალიან მნიშვნელოვანი იქნება, რომ ჩვენ მივაღწიოთ ღირსეულ გამარჯვებას, რაც თავისთავად, საქართველოს გამარჯვებას ნიშნავს,“-განაცხადა პრემიერმა.

მისივე თქმით, მნიშვნელოვანია, რომ ოქტომბრის საპარლამენტო არჩევნები ჩატარდეს დემოკრატიულ, თავისუფალ გარემოში, რაშიც მმართველ პოლიტიკურ ძალას განსაკუთრებული პასუხისმგებლობა აკისრია.

„დღეიდან გადავდივართ წინასაარჩევნო პერიოდზე, 4 თვე გვაშორებს მომავალ საპარლამენტო არჩევნებს. ეს იქნება ძალიან მნიშვნელოვანი პერიოდი, რომელიც ჩვენ ღირსეულად უნდა გავიაროთ და კიდევ ერთხელ უნდა დავამტკიცოთ, რომ ის მაღალი დემოკრატიული სტანდარტი, რომელიც იქნა ნაჩვენები როგორც საპრეზიდენტო, ასევე ადგილობრივი არჩევნების დროს, არათუ უნდა შევინარჩუნოთ, არამედ კიდევ უფრო უნდა გავაუმჯობესოთ,“-აღნიშნა გიორგი კვირიკაშვილმა.

პრემიერ-მინისტრის განმარტებით, მნიშვნელოვანია, რომ წინასაარჩევნო პროცესისთვის დამახასიათებელი ვნებათაღელვა და კონკურენცია დაპირისპირებაში არ გადაიზარდოს.

„ჩვენი მთავარი მიზანია, რომ კონკურენცია კონფრონტაციაში არ გადაიზარდოს და ამ მიმართულებით ჩვენ, როგორც სახელისუფლებო ძალას, გაათმაგებული პასუხისმგებლობა გვაკისრია, უპირველეს ყოვლისა ამომრჩევლის წინაშე და, რა თქმა უნდა, ჩვენი მხარდამჭერების წინაშეც. თავის მხრივ სხვა პოლიტიკურ ძალებსაც აკისრიათ დიდი პასუხისიმგებლობა, რათა კიდევ ერთხელ დაამტკიცონ, რომ საქართველო არის უპირველეს ყოვლისა და ჩვენ უნდა გავუფრთხილდეთ ქვეყანას, ვინაიდან მომავალ არჩევნებზე და მისი დემოკრატიულობის ხარისხზე იქნება დამოკიდებული ჩვენი ქვეყნის მომავალი განვითარება, მომდევნო ოთხი წლის განმავლობაში,“-განაცხადა პრემიერმა.

გიორგი კვირიკაშვილის თქმით, პარტიამ ,,ქართული ოცნება-დემოკრატიული საქართველო“ დაამტკიცა, რომ არის პოლიტიკური ძალა, რომელიც უზრუნველყოფს ქვეყნის სტაბილურ განვითარებას და რომელიც უკეთეს მომავალს მოუტანს ქვეყანას და ხალხს.

პარტიის საარჩევნო შტაბის უფროსის, კახა კალაძის განცხადებით, პარტია „ქართული ოცნება-დემოკრატიული საქართველო“ აქტიურ წინასაარჩევნო სამზადისზე გადადის.

„ნამდვილად საპასუხისმგებლოა ეს ყველაფერი ჩემთვის და ყველაფერს გავაკეთებ იმისთვის, რომ ღირსეულად გავართვა თავი ამ მნიშვნელოვან და საპასუხისმგებლო მისიას. დღეიდან ჩვენი პარტია „ქართული ოცნება- დემოკრატიული საქართველო“ იწყებს აქტიურ მზადებას ოქტომბრის საპარლამენტო არჩევნებისთვის , რომელშიც პარტია მონაწილეობას მიიღებს , როგორც დამოუკიდებელი პარტია. „ქართული ოცნება“, როგორც მმართველი პარტია გააკეთებს ყველაფერს იმისთვის, რომ არჩევნები ჩატარდეს დემოკრატიულ, სამართლიან, თავისუფალ და მშვიდობიან გარემოში. ჩვენ არავის მივცემთ იმის შესაძლებლობას, რომ პროვოკაციული და დესტრუქციული ქმედებებით ჩრდილი მიაყენონ ოქტომბრის საპარლამენტო არჩევნებს. ამ არჩევნებით დავანახებთ საერთაშორისო თანამეგობრობას, რომ საქართველოში მიმდინარე დემოკრატიული რეფორმები შეუქცევადი ხასიათისაა. ჩვენ უკვე დავასრულეთ პარტიის ცენტრალური საარჩევნო შტაბის ფორმირება, უახლოეს დღეებში დასრულდება ადგილობრივი შტაბების ფორმირების პროცესი. ჩვენი პარტიული რესურსი სრულად იქნება მობილიზებული ოქტომბრის საპარლამენტო არჩევნებში „ქართული ოცნებისა“ და ქართველი ამომრჩევლის გამარჯვებისთვის. კიდევ ერთხელ მინდა, ძალიან დიდი მადლობა გადავუხადო ბატონ გიორგის ამ ნდობისთვის. პარტია „ქართული ოცნება-დემოკრატიული საქართველო“ ყველაფერს გააკეთებს იმისთვის, რომ 2016 წლის საპარლამენტო არჩევნებში, რომელიც 8 ოქტომბერს გაიმართება წარმატებას მივაღწიოთ. ეს იქნება აუცილებელი ისევ და ისევ ჩვენი ქვეყნის, ჩვენი ხალხისთვის ჩვენი ქვეყნის დემოკრატიის განვითარებისთვის“,-განაცხადა კახა კალაძემ.