ივანე ჯავახიშვილის თბილისის სახელმწიფო უნივერსიტეტში 24 ივნისს განათლების სამინისტროს ინკლუზიური პროფესიული განათლების პროექტის დირექტორმა მარიკა ზაქარეიშვილმა საჯარო ლექცია წაიკითხა.
საჯარო ლექციაზე მარიკა ზაქარეიშვილმა ინკლუზიური განათლების, მისი მნიშვნელობისა და სახელმწიფოს მხრიდან კონკრეტული ღონისძიებების შესახებ დამსწრე საზოგადოებას ინფორმაცია მიაწოდა. შეხვედრა ორგანიზებული იყო „დემოკრატია და მოქალაქეობის“ სასწავლო კურსის ფარგლებში.
„დღევანდელი შეხვედრა, მიუხედავად ჩემი დატვირთული გრაფიკისა, მაინც შედგა, ჩემმა ყოფილმა სტუდენტებმა სასწავლო კურსის ფარგლებში დაწერეს პროექტი და მთხოვეს ამ პროექტის ფარგლებში ჩამეტარებინა საჯარო ლექცია უნივერსიტეტში
მათი პროექტი ეხება ინკლუზიურ განათლებას საქართველოში და აქვთ მცდელობა,რომ საზოგადოებამდე მიიტანონ ეს პარადიგმა .აქედან გამომდინარე ძალიან მოხარული ვარ, რომ ახალგაზრდები ამ საკითხებით არიან დაინტერესებულები,“ – განაცხადა საჯარო ლექციის დასრულების შემდეგ მარიკა ზაქარეიშვილმა.
შეხვედრის ორგანიზატორების თქმით, პროექტი მიზნად ისახავს ინკლუზიური განათლების ერთ-ერთი მთავარი სამიზნე ჯგუფის სპეციალური საგანმანათლებლო საჭიროების მქონე ბავშვთა სოციალიზაციის ხარისხის გაზრდას და საზოგადოების ინფორმირებულებას არსებული პრობლემის შესახებ.
„განათლება და მასთან დაკავშირებული პრობლემები ყოველთვის იყო,არის და იქნებ ერთ-ერთი ყველაზე აქტუალური საკითხი, ინკლუზიურ განათლება არის ზოგადად განათლების სისტემის შემადგენელი ნაწილი და ვთვლით, რომ თუ ინკლუზიური განათლება არ განხორციელდება ეფექტურად, ეს იქნება განათლების სისტემის ძალიან დიდი პრობლემა, ვინაიდან სახელმწიფო ვალდებულია უზრუნველყოს თითოეული ბავშვის სრულფასოვანი განათლება, რადგან ეს არის მათი ფუნდამენტური უფლება.
ის, რომ აღნიშნული საკითხი აქტუალურია, ამაზე მეტყველებს ის ფაქტიც, რომ მედია ბოლო პერიოდში განსაკუთრებულ ყურადღებას უთმობს ინკლუზიურ განათლებას და მასთან დაკავშირებული პრობლემების გაშუქებას. ჩვენი აზრით, საზოგადოება უფრო მეტად ინფორმირებული უნდა გახდეს ამ საკითხის ირგვლივ,“ – თქვა პროექტის ორგანიზატორმა ინგა ღოღობერიძემ.
ინკლუზიური განათლების დანერგვა პროფესიული განათლების სისტემაში 2013 წლის იანვრიდან დაიწყო. სსსმ პირებისათვის პროფესიული განათლების ხელმისაწვდომობა განათლების სამინისტროს ერთ-ერთი პრიორიტეტია. სამინისტროს მიერ შემუშავებულ იქნა სსსმ და შშმ პირებისათვის პროფესიული განათლების სისტემაში ჩარიცხვის მექანიზმი პროფესიული ტესტირების საფუძველზე, რომელიც ეფუძნება სტუდენტის მიერ დასახელებული პრიორიტეტული პროფესიის პრაქტიკულ მოსინჯავს. გადაწყვეტილების მიღება თუ, რომელ საგანმანთლებლო პროგრამაზე უნდა ჩაირიცხოს პირი ხდება მათი ინდივიდუალური საჭიროებების, ინტერესებისა და შესაძლებლობების ანალიზის საფუძველზე.
„საჯარო ლექციის შესახებ სოციალური ქსელიდან შევიტყვე. შეხვედრა, პირველ რიგში, ინფორმაციული თვალსაზრისით იყო საინტერესო, უფრო ნათლად გავეცანით ინკლუზიური განათლების თანამედროვე გამოწვევებსა და სამოქმედო გეგმებს. ამას გარდა, საინტერესო შეხვედრა გამოდგა პრაქტიკული თვალსაზრისითაც, გავეცანით უშუალო მიდგომებსა და მუშაობის სპეციფიკას.
როგორც აღინიშნა, ამ სფეროში მუშაობის დიდი გამოცდილებაა, აქედან გამომდინარე, უფრო კარგად დავინახეთ საქართველოში არსებული პრობლემები და პრობლემების მიზეზები, მივიღეთ ინფორმაცია სხვა ქვეყნების გამოცდილებისა და მრავალი სახის დისკრინიმაციის შესახებ,“ – აღნიშნა ღონისძიების სტუმარმა, ვალერი თევდორაძემ.
შეხვედრას სტუდენტები და დაინტერესებული პირები ესწრებოდნენ. საჯარო ლექცია ინტერაქციულ რეჟიმში მიმდინარეობდა, გამოითქვა სამომავლოდ მსგავსი ფორმატის მრავალჯერადი შეხვედრების ჩატარების სურვილიც.
საქართველოში სპეციალური საგანმანათლებლო საჭიროების მქონე პირთა პროფესიული განათლება საქართველოს განათლებისა და მეცნიერების სამინისტროსა და ნორვეგიის განათლებისა და კვლევის სამინისტროს ერთობლივი ინიციატივის ფარლებში ხორციელდება.
ნათია კეკენაძე
