„ჩვენ არ ვართ კომერციული ორგანიზაცია, მიზანი ქველმოქმედებაა. თავიდანვე, როდესაც ამ პროექტზე დავიწყეთ მუშაობა, იგულისხმებოდა, რომ დასრულების შემდეგ ის სახელმწიფოს გადაეცემოდა. ფონდი „ქართუ“ გაიღებს მთლიან ხარჯებს და მოგება სრულად წავა ბიუჯეტში“. ახალაშენებული პროექტი „Black sea Arena“ სახელმწიფოს გადაეცა. ამის შესახებ ფონდ „ქართუს“ გამგეობის თავმჯდომარემ ნიკოლოზ ჩხეტიანმა ტელეკომპანია „GDS“–ზე, გადაცემა „2030“–ის ეთერში ისაუბრა.
„ფონდს სამშენებლო და მობილიზაციის სამუშაოებში 115 მილიონ დოლარზე მეტი აქვს დახარჯული. ეს გაცილებით აღემატება დაანონსებულ ორას მილიონს. ეს არის უპრეცენდენტო ქველმოქმედების ფაქტი საქართველოს ისტორიაში და სათანადო შეფასება უნდა მიეცეს. ფონდმა „ქართუ“–მ გადაწყვიტა სახელმწიფოსთვის გადაეცა ობიექტი იმიტომ, რომ ეს არის ფონდის ძირითადი ფუნქცია. მთელი თავისი 20–წლიანი მოღვაწეობის ფარგლებში ფონდის საბოლოო ბენეფიციარი არის სახელმწიფო ან ქართველი ხალხი.
ბათუმის დელფინარიუმი, „ციცინათელას“ გასართობი პარკი, პრომეთეს მღვიმე, ეს პროექტები ფონდი „ქართუ“–ს მიერ არის განხორციელებული და შემდეგ სახელმწიფოსთვისაა გადაცემული. ბიუჯეტს მილიონობით შემოსავალი აქვს ამ ობიექტებისგან. რეგიონის განვითარებით მოსახლეობა ირიბ სარგებელს ნახავს, მოხდება ინვესტორების მოზიდვა, ტერიტორიის და ინფრასტრუქტურის განვითარება. ეს ბუნებრივია უნდა შეეხოს იმ რეგიონებს, რომლებსაც ყველაზე მეტად უჭირთ ამ კუთხით. გურიის სანაპიროს, იმ ტერიტორიას სადაც „Black sea Arena“ აშენდა, აკლდა ყურადღება ბოლო პერიოდში. თავად ობიექტი ქმნის საკმაო რაოდენობით სამუშაო ადგილებს ადგილობრივებისთვის. ამას ემატება ათი ათასობით ადამიანი, რომელსაც დასჭირდება აკომოდაცია, ღამის გათევა, შესაბამისად მოსახლეობისთვის დამატებითი შემოსავალი ჩნდება.
დაგეგმილი პროექტები დაანონსებულიც იყო და კიდევ გვექნება ოფიციალური პრეზენტაცია. მაისის ბოლოს დაანონსდა ტექნოლოგიური უნივერსიტეტის პროექტი. გვაქვს გეგმები ქუთაისი ტექნოლოგიურ უნივერსიტეტთან დაკავშირებითაც, თუმცა ამის გაჟღერება და დაანონსება მოგვიანებით მოხდება,“ – განაცხადა ნიკოლოზ ჩხეტიანმა.
მანანა ღოღობერიძე
