თბილისში, ოქტომბერში, საერთაშორისო ორგანიზაცია „Fiestalonia Mileno” 5 დღიან ფესტივალს გამართავს. ღონისძიების მთავარი ორგანიზატორი სწორედ ხსენებული ორგანიზაციაა, ქართული მხრიდან კი თბილისის მერია და „Vector Travel” ერთვებიან, როგორც თანაორგანიზატორები.
ღონისძიება – „Fiestalonia Georgia – InternaTional Art Conset” ძირითადად, ეროვნულ – კულტურული ღირებულებების წარმოდგენას მოიცავს. უფრო დეტალურად, ფესტივალის მიზნების, ბიუჯეტის, ფასებისა და სხვა დეტალების შესახებ, „თბილისი თაიმსი“ თბილისის მერიის კულტურის საქალაქო სამსახურს ესაუბრა:
როგორც ვიცით, ოქტომბერში თბილისი „ფიესტალონიას“ უმასპინძლებს, რომელიც საერთაშორისო ორგანიზაციის ძალისხმევით იმართება. რას გვეტყვით ამ ორგანიზაციის შესახებ და ამ ღონისძიებაში ჩართული თითოეული ორგანიზაციისა თუ სახელმწიფო სექტორის როლზე?
– „ფიესტალონია“ 2013 წლიდან წელიწადში რამდენჯერმე ესპანეთში, იტალიაში, საფრანგეთსა და ახლა უკვე საქართველოშიც, მართავს სახელოვნებო ფესტივალს სხვადსხვა ნომინაციებში, მათ შორის, სამხატვრო, საგუნდო, ქორეოგრაფიული, კლასიკური და ხალხური მუსიკა, საორკესტრო, ინსტრუმენტალური, თეატრალური და ვოკალური. ფესტივალში 30 მდე სხვადასხვა ქვეყნის წარმომადგენელი მონაწილეობს.
ღონისძიების გამართვის მიზანი რომ ჩამოგვიყალიბოთ, რა სარგებელს მოუტანს ის თბილისს?
– ეს არის საერთაშორისო ღონისძიება რომელიც ხელს შეუწყობს თბილისის, როგორც რეგიონის კულტურული ცენტრის, კულტურული ტურიზმის განვითარებას და გაზრდის ქალაქის ცნობადობას.
რა აქტივობებს მოიცავს ღონისძიება, ადგილი თუ არის შერჩეული, რამდენ ხანს გაგრძელდება და მასზე დასწრება უფასო იქნება თუ ბილეთები გაიყიდება?
– ღონისძიების ჩატარება იგეგმება ოქტომბრის ბოლოს – 23-28 ოქტომბერს. ამ ეტაპზე, ფესტივალის ჩატარების ადგილი უცნობია. ფესტივალზე დასწრება ფასიანია. ფესტივალის ორგანიზატორები ადგილობრივ და უცხოელ სტუმრებს სხვადსხვა ფასებს სთავაზობენ.
ბიუჯეტი თუ არის განსაზღვრული და ასევე, სამუშაო ჯგუფი შერჩეული?
ფესტივალის ბიუჯეტი ისევე როგორც სამუშაო ჯგუფის შემადგენლობა განსაზღვრულია და დაკომპლექტებულია ფესტივალის ორგანიზატორების მიერ.
დაახლოებით რა ოდენობის შემოსავლის მიღებას ელოდებით?
ქ. თბილისის მუნიციპალიტეტის მერია ფესტივალის ჩატარებისთვის საჭირო ფინანსურ რესურს არ გასცემს. ბოლო ინფორმაციით, ორგანიზატორები თავის თავზე იღებენ ყველა ხარჯს, გამომდინარე აქედან, უშუალოდ ფესტივალიდან მიღებული მოგება იქნება ფესტივალის ორგანიზატორების.
„ფიესტალონა მილენო“ უკვე დიდი ხანია ბაზარზეა და აწყობს ღონისძიებებს, თუმცა, „თბილისის მერიამ“ მასთან თანამშრომლობა წელს გადაწყვიტა. წინა წლებში რაიმე ხელისშემშლელი ფაქტორები იყო თუ ღონისძიების გამართვის ინტერსი არ იყო?
– ფესტივალის ორგანიზატორებს აქამდეც ჰქონდათ სურვილი ჩაეტარებინათ ფესტივალი, თუმცა მხოლოდ წელს შეძლეს ქალაქ თბილისის მუნიციპალიტეტის მერიასთან დაკავშირება. მერიამ გამოთქვა სრული მზადყოფნა თავისი კომპეტენციისა და შესაძლებლობის ფარგლებში დაეხმაროს ორგანიზატორებს ფესტივალის ჩატარებაში.
ღონისძიების პროგრამის, მონაწილეობისთვის საჭირო რეგისტრაციის, ფასებისა და სხვა დეტალების შესახებ უფრო დეტალური ინფორმაცია შეგიძლიათ მოიძიოთ შემდეგ ვერბ.გვერდზე: http://fiestalonia.net/
მარიამ ტაკაშვილი
