“სახელმწიფო საიდუმლოს თემა პოსტსკრიპტუმში გასული გუშინდელი სიუჟეტის შემდგომ გარკვეულწილად აქტუალური გახდა,” ამის შესახებ, სოციალურ ქსელში იურისტი, განათლების საერთაშორისო ცენტრის უფროსის მოადგილე, რატი ბრეგაძე წერს და ეხმაურება გუშინდელი პოსტსკრიპტუმის სიუჟეტს. სიუჟეტი ეხებოდა თემას, თუ როგორ აღმოჩნდა საქართველოს საიდუმლო სამხედრო ობიექტების კოორდინატები რუსული სპეცსამსახურების ხელში.
შეგახსენებთ, რომ რატი ბრეგაძე “ქართული ოცნების” მხრიდან საბურთალოს მაჟორიტარი დეპუტატის პოსტზე განიხილება, ამის თაობაზე მედიაში გავრცელდა და ჩვენც შემოგთავაზეთ მასალა.
“სახელმწიფო საიდუმლოს თემა პოსტსკრიპტუმში გასული გუშინდელი სიუჟეტის შემდგომ გარკვეულწილად აქტუალური გახდა.
საინტერესო იქნებოდა ამ ჭრილში იმ საკითხის განხილვა, როდესაც ყოფილი პრეზიდენტი და მთავარსარდალი, რომელსაც სრული წვდომა ჰქონდა ყველა კატეგორიის საიდუმლოზე უცხო სახელმწიფოს მოქალაქე და შემდგომში გუბერნატორი ხდება.
ასევე არის სამწუხაროდ სხვა არაერთი ყოფილი მაღალი თანამდებობის პირის შემთხვევაშიც, რომლებიც დღეს ოფიციალურად სხვა სახელმწიფოების სამსახურში არიან.” – წერს რატი ბრეგაძე.
ცნობისთვის, სიუჟეტში, გაერთიანებული შტაბის ყოფილი უფროსი, გენერალი გიგი კალანდაძის მტკიცებით, აგვისტოს ომის შემდეგ საქართველოს ტერიტორიაზე აშენებული საიდუმლო სამხედრო ობიექტების კოორდინატები და მთელი ინფორმაცია, მინდია ჯანელიძის მინისტრობის დროს, სხვა ქვეყნის სპეცსამსახურების ხელში აღმოჩნდა.
ტრისტან წითელაშვილი, რომელზეც გენერალური კალანდაძე საუბრობს, ყოფილი სამხედროა.
პოლკოვნიკი წითელაშვილი, 2008 წლის აგვისტოს ომის შემდეგ დააკავეს და სამშობლოს ღალატისთვის პატიმრობა მიუსაჯეს. 2013 წლის იანვარში, ხელისუფლებაში ქართული ოცნების მოსვლის შემდეგ მან ციხე დატოვა.
კალანდაძის მტკიცებით წითელაშვილი, საცეცხლე წერტილებზე მინდია ჯანელიძის მინისტრობის დროს დანიშნულმა, გენინსპექციის თანამშრომელმა გოდერძი ორმოცაძემ შეიყვანა, რომელმაც საიდუმლო ბაზაზე შესვლა სამსახურეობრივი საშვით შეძლო.
The Tbilisi Times
Discussion about this post