საქართველოს საპატრიარქოს ოფიციალურმა დელეგაციამ დაასრულა შეხვედრები ნატოს შტაბბინაში, სადაც სინოდის წარმომადგენლებს ნატო-საქართველოს ურთიერთობებზე ინფორმაცია გენერალური მდივნის სპეციალურმა წარმომადგენელმა კავკასიასა და ცენტრალურ აზიაში, ჯეიმს აპატურაიმ მიაწოდა. ვიზიტს გაცნობითი ხასიათი ჰქონდა. მხარეებმა საქართველოს ევროპული ინტეგრაციის მნიშვნელობასა და საერთო ღირებულებებზე იმსჯელეს. სინოდის წევრები, სასულიერო პირები და საპატრიარქოს წარმომადგენლები ნატოსა და ევროკავშირის წარმომადგენლებს შეხვდნენ. შეხვედრა გაიმართა ქართულ სამრევლოსა და დიასპორასთანაც.
როგორც ჯეიმს აპატურაიმ ჟურანალიტებთან საუბრისას განაცხადა, საპატრიარქოს დელეგაციის ვიზიტი იყო გაგარძელება იმ შეხვედრისა, რომელიც რამდენიმე წლის წინ მასსა და კათოლიკოს პატრაირს შორის თბილისში გაიმართა.
„სასულიერო პირების დელეგაცია კარგად იყო მიმდინარე მოვლენებზე ინფორმირებული და სიღრმისეული საუბარი შედგა საქართველოს შიდა პოლიტიკურ პროცესებზე, საქართველოს გამოწვევებსა და იძულებით გადაადგილებულ პირებზე. ასევე ვისუბრეთ, შავი ზღვის უსაფრთხოებაზე, ნატო-საქართველოს ურთიერთობებზე. ამ შეხვედრიდან ჩემთვის ყველაზე მნიშვნელოვანია იყო ის, რომ საპატრიარქოს დლეგაცია მხარს უჭერს ქართველი ხალხის ნებას,“-განაცხადა ჯეიმს აპატურაიმ ჟურნალისტებთან საუბრისას.
ნატოს შტაბბინაში გამართული შეხვედრები ქართულმა მხარემაც დადებითად შეაფასა. რუსთაველმა მიტროპოლიტი იოანე გარეკელმა „პირველ არხთან“ საუბრისას აღნიშნა: „ამ ვიზიტმა ყველა დაარწმუნა, რომ გავრცელებული ინფორმაცია თითქოს საქართველოს ეკლესია წინააღმდეგია ევროინტეგრაციის არასწორია.“ ხოლო ბელგიისა და ჰოლანდიის ეპისკოპოსმა მეუფე დოსითეოს ბოგვერაძე თქვა, რომ არსებობს საერთო ღირებულებები ჩვენსა და ევროპულ ღირებულებებს შორის, ქრისტიანობა თავისი ბუნებით არის გახსნილი, დემოკრატიული. ამდენად, ვიზიტიც ძალიან საინტერესო იყო.
საინფორმაციო შეხვედრების ციკლის მნიშვნელობაზე გორის და ატენის მიტროპოლიტმა მეუფე ანდრია გვაზავამაც ისაუბრა. „ვისაუბრეთ აფხაზეთსა და სამაჩაბლოში დღეს არსებულ რთულ ვითარებაზე, დევნილთა რაოდენობასა და გზებზე, თუ როგორ შეიძლება ამ ყოველივეს დაძლევა. რაღა თქმა უნდა საქართველოს ეკლესია მხარს უჭერს ქართველ ხალხს, ქართულ სახელმწიფოს და მის მშვიდობიან განვითარებას,“-მეუფე ანდრია.
ოფიციალური ვიზიტის ფარგლებში შეხვედრები გაიმართა ევროპის საგარეო ქმედებათა სამსახურის აღმოსავლეთ სტრატეგიული კომუნიკაციის ჯგუფის ხელმძღვანელ ჯაილს პორტმანთან, ცენტრალური აზიის მიმართულების აღმასრულებელ დირექტორ ტომას მაირჰარტინგსა და ჰუმანიტარული დახმარებისა და კრიზისების მართვის ევროკომისარ, ქრისტოს სტილიანიდისთან.
პროექტი განვითარებისა და დემოკრატიის ცენტრმა (CDD), სსიპ ნატოსა და ევროკავშირის შესახებ საინფორმაციო ცენტრთან, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატთან, საქართველოს საპატრიარქოს განათლების სისტემასა და წმიდა დავით აღმაშენებლის სახელობის განათლების ცენტრთან პარტნიორობით განახორციელა. პროექტის ფინანსური მხარდამჭერი იყო დიდი ბრიტანეთის სამეფოს საელჩო საქართველოში.
შეგახსენებთ, რომ საქართველოს საპატრიარქო დელეგაციის ვიზიტი ბრიუსელში 7-11 ნოემბერს გაიმართა და მასში მაღალი რანგის სასულიერო პირები იღებდნენ მონაწილეობას. საქართველოს კათოლიკოს პატრიარქის ლოცვა – კურთხევით, დელეგაციას ახალციხისა და ტაო-კლარჯეთის მიტროპოლიტი თეოდორე ჭუაძე ხელმძღვანელობდა.
სოფიკო ნინიკაშვილი