მეამაყება ჩემი გუნდის წევრებთან ერთად განვლილი თითოეული დღე ამ ოთხი წლის განმავლობაში, – ამის შესახებ საქართველოს პრემიერ-მინისტრმა გიორგი კვირიკაშვილმა მთავრობის სხდომაზე განაცხადა.
მისი თქმით, ოთხი წლის განმავლობაში, როგორც ქვეყნის შიგნით, ასევე ქვეყნის გარეთ უამრავი გამოწვევა იყო.
“ჩვენ ერთად ვუმკლავდებოდით ყველა გამოწვევას, რაც უდაოდ საამაყოა. მე, როგორც ამ ქვეყნის პრემიერ-მინისტრს, მეამაყება ჩემი გუნდის თითოეული წევრთან ერთად განვლილი თითოეული დღე ამ ოთხი წლის განმავლობაში. ყველაზე მნიშვნელოვანია, რომ ჩვენ ერთად ჩავუყარეთ საფუძველი ოთხპუნქტიან გეგმას, რომელიც უნდა გახდეს საფუძველი მომავალი ოთხი წლის განმავლობაში ქვეყანაში მნიშვნელოვანი ეკონომიკური გარღვევის, განათლების სისტემაში ძირეული ცვლილებების, ქვეყნის ინფრასტრუქტურული მოდერნიზების, სივრცითი მოწყობის განვითარების, მმართველობითი სისტემის კიდევ უფრო დახვეწის და შეცვლის. ეს უდაოდ იქნება თითოეული მოქალაქისთვის უფრო მეტი კეთილდღეობა. ჩვენი მიზანიც სწორედ ეს არის, თითოეულმა მოქალაქემ იგრძნოს ის მნიშვნელოვანი ცვლილებები, რომელიც ქვეყანაში ხდება და მოხდება“, – განაცხადა გიორგი კვირიკაშვილმა.
მისივე თქმით, ნდობა, რომელიც მოსახლეობამ არჩევნებზე „ქართულ ოცნებას“ გამოუცხადა, თითოეული ადამიანის კეთილდღეობას უნდა მოხმარდეს.
“ეს უდიდესი ნდობა, რომელიც ჩვენმა მოსახლეობამ გამოგვიცხადა არჩევნების პერიოდში, გასული არჩევნების დროს, რომელიც თავისთავად იყო ძალიან დიდი წარმატება ქვეყნის დემოკრატიული განვითარების გზაზე აუცილებლად უნდა გარდავქმნათ თითოეული ადამიანის კეთილდღეობაში, მთელი ქვეყნის მასშტაბით თვალშისაცემი, თვისობრივი, ხარისხობრივი ცვლილებების მოტანაში. კიდევ ერთხელ მინდა, მადლობა გადაგიხადოთ. ჩვენს ქვეყანას მინდა ვუსურვო უკეთესი ხვალინდელი დღე”, – განაცხადა გიორგი კვირიკაშვილმა.
