„ჩვენ გვაქვს სკოლა, რომელიც სავსეა საზეპიროებით. თუ პირველი ვეფხისტყაოსანს ავირჩევთ, რა თქმა უნდა შევცდებით. ვეფხისტყაოსანი არის ესთეტიკის მატარებელი, მაგრამ თარიღები რატომ უნდა ახსოვდეს ბავშვს. ზეპირობა არ გაქრება, ესთეტიკური საზეპირო, სადაც სილამაზეა და ახალგაზრდა ეუფლება, იქ დარჩება“. ამის შესახებ განათლებისა და მეცნიერების მინისტრის მოვალეობის შემსრულებელმა ალექსანდრე ჯეჯელავამ ტელეკომპანია „მაესტროზე“, გადაცემა „კონტაქტის“ ეთერში ისუაბრა.
„როდესაც საზეპიროები ვახსენე, ყველამ ლექსი და სიმღერა წარმოიდგინა. არავინ წარმოიდგინა მდინარის შენაკადების რაოდენობა, ნივთიერებების მოლური მასები, ქვეყნის დედაქალაქები, ფორმულების დაზეპირება. ჩემი მოსაზრებების ნაწილი შესაძლოა დასაწუნი იყოს. თუმცა მიხარია, რომ ჩვენს მიერ წამოჭრილ საკითხებზე საზოგადოებამ აქტიური პოზიცია დაიკავა, ზოგიერთი ადამიანის შემთხვევაში ეს ცინიკურია, თუმცა უმეტესად მიმდინარეობს საზოგადოებრივი განხილვა. მიხარია და დიდი იმედი მაქვს, რომ ამ წლების განმავლობაში არ დაცხრება საზოგადოებრივი აქტიურობა განათლების თემების გარშემო. თუ ცუდი არ დავანგრიეთ, კარგს ვერ ავაშენებთ.
ყველა ეტაპზე ჩვენი ამოცანაა უფრო მაღალი საფეხურის მასწავლებელმა მეტი ხელფასი მიიღოს. იანვრიდან იზრდება ზედა საფეხურების ხელფასები, ქვედა საფეხურისთვის პროფესიული განვითარების სქემა მუქარის შემცველი აღარ იქნება. ხელფასების მნიშვნელოვნანი ზრდა შეეხება ზედა საფეხურებს. მინიმალური ხელფასიც გაიზრდება ეკონომიკის ზრდასთან ერთად. თუმცა ახლა, იანვარში არა. დავიწყება არც სკოლის დირექტორის, არც ადმინისტრაციის და ბიბლიოთეკარის არ შეიძლება. მე პირობა მინდა მივცე მათ, რომ პრობლემა პირველივე დღიდან ვიცი და დარწმუნებული ვარ შევძლებ მის მოგვარებას“.
ალექსანდრე ჯეჯელავამ ახალი სამთავრობო გუნდის შესახებაც ისაუბრა.
„ოპოზიციის ნაწილისთვის ვინმე მოსაწონი რომ იყოს ამ სიტუაციაში უფრო სახიფათოა. ველი მწვავე რამდენიმე დღეს, თუმცა იმედი მაქვს ურთიერთობა იქნება კონსტრუქციული. მთავრობა მუდმივად უნდა იყოს ფორმაში და ანგარიშვალდებული პარლამენტთან. ვაპირებ მთელი ამ წლების განმავლობაში არა ერთხმად, არამედ კონსტრუქციულ ოპონირებაში ვიმუშაოთ“.
მანანა ღოღობერიძე
