დღეს საქართველო სამოქალაქო თვითშეგნების კუთხით უამრავი პროექტი ხორციელდება, ამ კუთხით კი კიდევ ერთი საინტერესო კამპანია გაჩნდა – „Stopxamსაქართველო“. აღნიშნულ კამპანიაზე, მის მიზნებსა და სამომავლო გეგმებზე ..თბილისი თაიმსი“ დამფუძნებელსა და კამპანიის ლიდერს ლევან კენჭოშვილს გაესაუბრა:
– როდის, რატომ და როგორ გაგიჩნდათ კამპანიის იდეა?
– იდეა გაჩნდა 17 ოქტომბერს,დღეს, როდესაც საბოლოოდ შევწყვიტე ფიქრი და დავიწყე მოქმედება ჩემი გუნდის წევრებთან ერთად. კანონის დაცვას რომ თავი დავანებოთ, ელემენტარული პატივისცემა და ზნეობრივი ელემენტებიც აღარ შემორჩა საზოგადოებას, საუბარია, საავტომობილო გზებსა და ტროტუარებზე. შეიძლება არ იყო კანონმორჩილი, მაგრამ იყო ეთიკური მოქალაქე, მძღოლი, რომელიც პატივს სცემს ფეხით მოსიარულეებს. ნებისმიერმა ბავშვმა, მოზარდმა, მშობელმა თუ პარლამენტარმა – იცის, რომ ამ მხრივ საკმაოდ ჩამოვრჩებით განვითარებულ ევროპულ ქვეყნებს, ქართველ ხალხს კი გვაქვს ამბიცია ვიყოთ ევროპელები, მაგრამ სრულიად აბსტრაქტული მიმართულება გვაქვს აღებული, რომლის გამოსწორებასაც წლები დასჭირდება, ან მეტიც, არასდროს გამოსწორდება. მე კი მაქვს ამბიცია, რომ საქართველო მოწინავე ქვეყნების სიაში ეწეროს, მინდა, რომ ვიყოთ პროგრესულები, მინდა, რომ ჩვენი დამოკიდებულებები და მენტალობა გახდეს სრულიად კონტრასტული ახლო მომავალში ,ამის პოტენციალი ქართველ ხალხს ნამდვილად აქვს,მაგრამ ბრბო უმრავლესობაშია,ზუსტად ამიტომ სჭირდება ყველა პრობლემის ფიქსაციას დრო, თანაც დიდი. ავტომობილებსა და მათ უმსგავსო მძღოლებს რაც შეეხება, არ ,,ეშინიათ” კანონის, მაგრამ ეს ისევ და ისევ სახელმწიფოს ბრალია, რა თქმა უნდა. მე შემიძლია ტროტუარზე პარკირებული ავტომობილის დანახვის შემდეგ, გადავიდე ავტომობილების სავალ ნაწილზე ან საერთოდ რატომ უნდა მიწევდეს ეს, მაგრამ რა ქნას იმ შშმ პირმა, რომელსაც არ აქვს ფიზიკური შესაძლებლობები, ჩავიდეს საკუთარი სავალი ნაწილიდან და შეიქმნას საფრთხე, გადავიდეს ავტომობილთა სავალ ნაწილზე. განვმეორდები, კანონი საერთოდ რომ არ არსებობდეს, ადამიანში მაინც უნდა იყოს რაღაც ელემენტარული მოქალაქეობრივი თვითშეგნება მაინც, ვგულისხმობ, ქვეითებთან მიმართებაში ცივილურ დამოკიდებულებას, არ შეიძლება ყოველთვის ის აკეთო,რაც გინდა, სხვაზე ფიქრი ჩვენი ჰობი მართალია არ არის,მაგრამ ამ კამპანიის მოტივიც ზუსტად ცნობიერების ამაღლებაა,რომ მძღოლების გარდა, არსებობენ მოქალაქეებიც, რომლებსაც ავტომფლობელები ზღუდავენ. შემიძლია საკუთარ თავს მოვარგო იმ ადამიანის სტატუსი,რომელსაც ეს ყველაფერი მობეზრდა და გადადგა ნაბიჯი ამ პრობლემის აღმოსაფხვრელად.
– რა მეთოდებით საქმიანობთ და ვინაა თქვენი ,,მსხვერპლი“?
– მე და ჩემი გუნდის წევრები არასწორად პარკირებული ავტომობილების საქარე მინაზე ვაკრავთ სტიკერს,რომელზეც წერია ,,მე არ ვიცავ კანონს, ვაპარკირებ სადაც მინდა” – ეს მეთოდიკა სრულიად გამართლებულია და არ სცდება კანონს.
– როგორც ვიცი, მსგავსი სახელწოდების აქცია სხვა ქვეყნებშიც (მაგ: რუსეთი) მიმდინარეობს, რა შედეგი გამოიღო და რა შეიცვალა სამოქალაქო ცნობიერებაში?
– დიახ,მსგავსი შინაარსის კამპანიები არსებობს არა მარტო რუსეთში, არამედ სხვა ევროპულ ქვეყნებშიც და დღემდე წარმატებულად პოზიციონირებს, უბრალოდ რუსეთში ამ კამპანიამ მიიღო ,,სუპერპოპულარული” სახე და საზოგადოებამაც ,,სტოპხამი“ გაიცნო რუსეთის სახელით. შედეგი ნამდვილად არის, თანაც ძალიან კარგი, მოგეხსენაბათ სხვა ქვეყნებშიც სოციალური ქსელების საშუალებით აშუქებენ საკუთარ კამპანიას და თუ უყურებთ, დაინახავთ, როგორ რადიკალურად შეიცვალა სამოქალაქო ცნობიერება ,აქტივისტების დანახვის შემდეგ, ავტომფლობელები მიმართავენ მათ,რომ სტიკერი არ დაუკრან და დაუყოვნებლივ დატოვებენ ადგილს,სადაც არასწორად გადაწყვიტეს პარკირება,ამ შედეგამდე მისვლას შრომა სჭირდება და ჩვენც დავამტკიცებთ,რომ ეს პრობლემა მოგვარებადია.
– როგორია მოქალაქეების დამოკიდებულება თქვენი კამპანიის ფარგლებში? თუ გყავთ მოწინააღმდეგები ან მომხრეები?
– ჩვენი პირველი ვიდეოს გამოჩენის შემდეგ სოციალურ ქსელში, საზოგადოება ორად გაიყო,თუმცა პროცენტულად მომხრეების რიცხვმა 78%-ს მიაღწია,ეს ოფიციალური ანალიტიკაა. თბილისის ფორუმზე და სხვა მრავალ ვებსაიტზე აქტიურად განიხილავენ ჩვენს საქმიანობას და, რა თქმა უნდა, არსებობს ოპოზიციაც, რომელსაც აქვს მხოლოდ ერთი არგუმენტი ჩვენი დისკრიმინირებისათვის, ეს არის პლაგიატიზმი, მითუმეტეს ჩვენი ოკუპანტი ქვეყნის,რუსეთისგან აღებული. რომ შემეძლოს, ყველას სათითაოდ მივწერდი, რომ ეს კამპანია ჯერ კიდევ 80-იან წლებში დაიწყო ლონდონში, განსხვავებული მეთოდებით, უბრალოდ რუსეთმა გადაწყვიტა გაეშუქებინა და საზოგადოებამაც მიიღო ინფორმაცია. რუსული მმართველობა მძულს, ამას ხაზს ვუსვამ და ძალიან გულდასაწყვეტია,როცა ,,რუსეთის” დაქვემდებარებაში მყოფ ორგანიზაციის სტატუსს გვარგებენ. ჩვენ ვართ სრულიად დამოუკიდებელი საზოგადოებრივი ორგანიზაცია,რომელიც შემოიფარგლება მხოლოდ საკუთარი ფინანსებით, ეს ხალხმა უნდა შეიგნოს.
– რა შედეგს ელით საქართველოში და როგორია თქვენი სამომავლო გეგმები?
• როგორც უკვე ვახსენე, შედეგს აუცილებლად დავდებთ, უბრალოდ დრო გვჭირდება, გავიმეორებ, ეს ყველაფერი კეთდება სახელმწიფოს მოტივაციისათვის, რომ მოხდეს სანქციების გამკაცრება, ეს ყველაფერი კეთდება იმისთვის, რომ პარაზიტი ორგანიზაციის “C.T PARK-ის“ ნაცვლად სხვა ორგანომ მოახდინოს ამ პრობლემების ფიქსაცია, მათი მიზანი ხომ მხოლოდ ფინანსური და მატერიალურია, ბიუჯეტში 25 მილიონი აქვთ, მაგრამ ამ ფინანსების გამოყენებას ტვინი სჭირდება, რომლის არსებობაშიც ეჭვი მეპარება. ორგანიზაცია, რომელსაც აბსოლუტურად ყველა შესაძლებლობა აქვს ამ პრობლემის რეგულაციისთვის, არ აკეთებს არაფერს, არაფერს – ა რ ა ფ ე რ ს!
თუ სახელმწიფო გაზრდის ჯარიმების ოდენობას, ეს იქნება პირველი სწორად გადადგმული ნაბიჯი ამ მდგომარეობის გასანეიტრალებლად.
ნატალია ჯალაღონია
