2017 წლის თებერვალში „საყოველთაო ჯანდაცვის პროგრამაში“ ცვლილება შეიტანეს, განახლდა საყოველთაო ჯანდაცვის მოსარგებლეთა ბაზები, შედეგად, კერძო სადაზღვევო პაკეტის მქონე მოქალაქეები საყოველთაო ჯანდაცვის პროგრამით ვეღარ ისარგებლებენ. ცვლილების შედეგად, ყველა ის მოქალაქე, რომელიც კერძო სადაზღვევო მომსახურებით არ სარგებლობს (115 ათასი ადამიანი), „საყოველთაო ჯანდაცვის პროგრამის“ საბაზისო პაკეტის მოსარგებლე გახდება, რომელიც გეგმიურ ამბულატორიულ მომსახურებას, გადაუდებელ ამბულატორიულ და სტაციონარულ დახმარებას, გეგმიურ ოპერაციებს (მათ შორის კარდიოქირურგიულ ოპერაციებს), ქიმიო-ჰორმონო და სხივურ თერაპიას, მშობიარობასა და საკესრო კვეთას მოიცავს.
იმის გასარკვევად, იმოქმედებს თუ არა „საყოველთაო ჯანდაცვის პროგრამაში“ შეტანილი ცვლილება კერძო სადაზღვევო კომპანიების ტარიფებზე და ზოგადად, იგეგმება თუ არა, ამ მხრივ, მომხმარებელთათვის რაიმე სიახლე, The Tbilisi Times ბაზარზე არსებულ რამდენიმე კერძო სადაზღვევო კომპანიას დაუკავშირდა.
“იმედი L”: „აუცილებლად შეიცვლება არსებული პროდუქტების სტრუქტურა და დიზაინი, რათა ჩვენი შეთავაზება მოერგოს საყოველთაო ჯანდაცვის პროგრამაში დაგეგმილ ცვლილებებს. ჩვენ არ გვაქვს მოლოდინი, რომ დაანონსებულ ცვლილებებს პროდუქტების ფასზე რაიმე მნიშვნელოვანი გავლენა ექნება. სადაზღვევო პროდუქტის ფასი, უპირველეს ყოვლისა, განპირობებულია კონკრეტული პროდუქტში გათვალისწინებული სერვისების ოდენობითა და მოცულობით, თუმცა ჩვენს არსებულ კორპორაციულ პორტფელზე დაყრდნობით შეგვიძლია ვთქვათ, რომ ბაზარზე კორპორაციული პროდუქტის საშუალო ფასი 40-45 ლარია (თვეში).
პრივილეგია ძალიან პირობითი და სუბიექტური კრიტერიუმებით შეფასებადი ინდიკატორია, თუმცა, თუ შევთანხმდებით და აქ მოვიაზრებთ იმ განსხვავებულ და ღირებულ სარგებელს დაზღვეულისთვის, რომელიც ჩვენთან დაზღვევის შემთხვევაში აქვთ, შემიძლია შემდეგი ჩამონათვალი შემოგთავაზოთ:
- უპრეცედენტო ხელმისაწვდომობა სადაზღვევო შემთხვევისას მომსახურების მიღებაზე;
- ხელმისაწვდომობის კუთხით მნიშვნელოვანია სერვის ცენტრების რაოდენობა, დღეის მდგომარეობით თბილისში ოთხი სერვის ცენტრით, და ეს რაოდენობა სამომავლოდ უფრო გაიზრდება;
- მაქსიმალურად მოქნილი სადაზღვევო პროდუქტების შექმნა განსაკუთრებით კორპორაციულ სეგმენტზე;
- მომსახურების მისაღებად და მიღებისას მინიმალური ბიუროკრატია და მაქსიმალურად მოქნილი მომსახურების მიღების სქემები და პროცედურები;
- არ ანაზღაურებისთვის დამატებითი პროცედურული ბერკეტები პრაქტიკულად მოხსნილია.
- გამონაკლისების კუთხით კიდევ უამრავი დაფარვებია, რომლებიც, ჩვენთან დაზღვევის შემთხვევაში, ანაზღაურებას ექვემდებარება. მაგალითად: ჰომეოპათიური მედიკამენტები, იმუნომოდულატორები, იმონოდეპრესანტები, ფსოქოტროპული პრეპარატები, დიაბეტი თავისი გართულებებით, თანდაყოლილი და გენეტიკური დაავადებების ოპერაციული მკურნალობა. ვანაზღაურებთ არა მარტო სამოყვარულო სპორტის შედეგად მიღებულ ტრავმასთან დაკავშირებულ პრობლემატიკას, არამედ პროფესიული სპორტის შემთხვევაში ოპერაციულ მკურნალობასაც.“
“პსპ დაზღვევა“: ,,პსპ დაზღვევა ჯანდაცვის რეფორმის ცვლილებების შემდეგ, რაიმე სახის ცვლილებას, რაც შეიძლება ფასებზე აისახოს, არ გეგმავს. მოგეხსენებათ, ჩვენ გვაქვს კორპორატიული ჯანმრთელობის დაზღვევა, სადაც ფასები 1 ადამინის შემთხვევაში 10 ლარიდან იწყება, ყველა დამატებითი გარემოების გათვალისწინებით, რაც კომპანიის თანამშრომლების რაოდენობით, დაზღვევის მსურველთა და მოთხოვნათა შესაბამისად განისაზღვრება. ზედა ზღვარი როგორც ასეთი არ არის დაწესებული. პსპ დაზღვევა თავის მომხმარებლებსმთელი საქართელოს მასშტაბით 150 ოჯახის ექიმის მომსახურებას, 300 პროვაიდერ კლინიკასა და 70 სტომატოლოგიურ კლინიკას სთავაზობს. ასევე, აღსანიშნავია, რომ ჩვენ გვაქვს ონლაინ პორტალი www.online.ipsp.ge, სადაც მომხმარებლებს შეუძლიათ დაგეგმონ ვიზიტი ოჯახის ექიმთან ცხელ ხაზთან დაკავშირების გარეშე. ასევე, სადაზღვევო ანაზღაურების უფასო ადგილზე მიტანის სერვისიც გვაქვს.
“სადაზღვევო კომპანია ალფა“: ,,ზოგადად, ნებისმიერი ჯანდაცვის რეფორმის ცვლილება კერძო დაზღვევის სექტორის საქმიანობაზე ზეგავლენას ახდენს, რომელიც შეიძლება დაკაშირებული იყოს, როგორც სადაზღვევო პროდუქტის ფასთან, ასევე სადაზღვევო პირობების ფორმირებასთან. იქიდან გამომდინარე, რომ ჯანდაცვის რეფორმის საბოლოო ცვლილებები ჯერ ძალაში არ არის შესული, რაიმე კონკრეტულ აქტივობებსა და გეგმებზე საუბარი გაგვიჭირდება.
სადაზღვევო კომპანია ალფას ამ ეტაპზე ინდივიდუალური ჯანმრთელობის პროდუქტი არ აქვს. ხოლო კორპორატიული პაკეტის ფასი დასაზღვევი ორგანიზაციის პარამეტრებზეა დამოკიდებული. ჩვენი დაზღვეულები სარგებლობენ მაღალი სტანდარტის სამედიცინო მომსახურებით სხვადასხვა წამყვან სამედიცინო დაწესებულებებში. ჩვენი კომპანია ინდივიდუალრად უდგება თითოეულ დაზღვეულ ბენეფიციარს და ყოველთვის იცავს მათ ინტერესებს. ალფას გააჩნია პროვაიდერი სამედიცინო დაწესებულებების ყველაზე ფართო ქსელი მთელი საქართველოს მასშტაბით, რაც ბენეფიციარებისთვის სამედიცინო მომსახურების მიღების ხელმისაწვდომობას ზრდის. ასევე, ალფა, ბაზარზე ახალი ინოვაციური სადაზღვევო პროდუქტების შემოტანას აპირებს.“
ნინო ზარიძე
