გასულ თვეს საქართველოში ევანგელურ-ლუთერულმა ეკლესიამ (სელე) სინოდის სხდომაზე ახალი ეპისკოპოსი აირჩია. ჩვენ მისი ვინაობით დავინტერესდით და პასტორ ირინა სოლეის დახმარებით საინტერესო დეტალებიც გავარკვიეთ.
„თბილისი თაიმსი“ გთავაზობთ ეპისკოპოს მარკუს შოხზე მცირე ბიოგრაფიული ცნობებს:
საქართველოში ევანგელურ-ლუთერული ეკლესიის ახალი ეპისკოპოსის მარკუს შოხი დაიბადა 1966 წელს ვიურტემბერგის პატარა ქალაქ შვებიშ ჰალ-(Schwäbisch Hall)-ში. ევანგელურ-ლუთერული თეოლოგიური განათლება მიიღო ტიუბინგენის და ლაიფციგის უნივერსიტეტებში. პასტორად ხელდასმული იქნა 1999 წელს იერუსალიმის და ვიურტემბერგის ლუთერულ მრევლებში თითქმის ოთხ წლიანი პრაქტიკის შემდეგ.
2001-2004 წწ. მოღვაწეობდა ქალაქ სამარის (რუსეთი) ლუთერულ ეკლესიის პასტორად, აქედან ბოლო 3 წელი სამარის რეგიონის პროპსტი იყო ანუ პრაქტიკულად ასრულებდა ეპისკოპოსის მსახურებას. 2004-2012 წწ. მოღვაწეობდა ვიურტემბერგის ქალაქ ზინდელფინგენში, 2012 წლიდან არის გერმანული ლუთერული ეკლესიის პასტორი რიგაში (ლატვია).
საქართველო გაიცნო ზინდელფინგენში მუშაობის დროს, რადგან ვიურტემბერგის ევანგელური სამხარეო ეკლესია და საქართველოში ევანგელურ-ლუთერული ეკლესია დიდი ხანია უძღვებიან პარტნიორულ ურთიერთობებს. ეპისკოპოს მარკუს შოხს ყოველთვის კარგი შთაბეჭდილებები ჰქონდა საქართველოზე, იცნობდა „სელე“-ს საქმიანობას, ჰქონია შეხვედრები მის წარმომადგენლებთან როგორც გერმანიაში ასევე საქართველოშიც. ამდენად, გადაწყვეტილება ჩამოსულიყო ჩვენს ქვეყანაში მისთვის რთული არ იყო.
პასტორ მარკუს შოხს ჯერჯერობით არა აქვს სამომავლო, მზა გეგმები საქართველოში მოღვაწეობის შესახებ, რადგან თვლის, კარგად უნდა შეისწავლოს სელე-ს შიდა და გარე სიტუაცია, რასაც სჭირდება დრო.
მისი მსახურება ლატვიაში კიდევ ერთი წელი გაგრძელდება. ეპისკოპოსად 2017 წლის ნოემბრამდე ჰანს-იოაჰიმ კიდერლენი რჩება.
სოფიკო ნინიკაშვილი
