„უნდა განისაზღვროს ვინ მიიღებს საყოველთაო ჯანდაცვის პაკეტს და ვინ არა. დღეს 500 ათას კაცს ფორმალურად არ ეკუთვნის საყოველთაო ჯანდაცვა. ეს არის პროგრამა, რომელიც მიმართულია დაუზღვეველი ადამიანებისკენ“. საყოველთაო ჯანდაცვის რეფორმის ახალი ტალღის შესახებ პარლამენტის ჯანდაცვის კომიტეტის თავმჯდომარემ აკაკი ზოიძემ „საზოგადოებრივ მაუწყებელზე“, გადაცემა „რეალური სივრცის“ ეთერში ისაუბრა.
„დღეს არის სისტემა, რომ ვისაც ჭირდება, იმას უფინანსებ, მონაწილეობს ყველა სამედიცინო დაწესებულება, რომელიც დარეგისტრირდება. ესენი არიან ადამიანები, რომლებსაც არ აქვთ კერძო დაზღვევა. უნდა შევთანხმდეთ კრიტერიუმზე, ვის ეკუთნის საყოველთაო დაზღვევა. ახლა სწორედ ეს დისკუსია მიმდინარეობს, დასადგენია ასევე უნდა იყოს თუ არა ქონებრივი ცენზი. ერთ სულ მოსახლეზე რომ გადავითვალოთ 660 მილიონი მაქსიმუმ 200 ლარს შეადგენს. ეს 100 დოლარზე ნაკლები თანხაა ერთ სულ მოსახლეზე. მაშინ, როდესაც ყველაზე იაფი პაკეტი 135 $ ღირს. ამერიკის შეერთებული შტატები ხარჯავს 9 ათას დოლარს ერთ სულ მოსახლეზე, გერმანია, შვეიცარია, ხარჯავენ 3-დან 7 ათასამდე.
პირველი ნაბიჯი იქნება არაადეკვატური, ეს იქნება კლინიკების გამორიცხვა პროგრამიდან, რომლებიც რეალურად პაციენტის უსაფრთხოებაზე პასუხისმგებლობის აღებას ვერ ახერხებენ. შესაძლოა იქ კარგი აპარატურაც ჰქონდეთ, სპეციალისტებიც მუშაობდნენ შეთავსებით, მაგრამ ეს მაინც ფრაგმენტულია, საბოლოოდ პროფესიონალიზმის დონე არ არის მაღალი. იმ მინიმალური სტანდარტების არსებობის გამო, რომელიც არის სანებართვო პირობებში, შესაძლოა ეგრედწოდებული სარდაფში გახსნილი რეანიმაციები თუ სამოთახიანი ინტენსიური მომსახურების პალატები მონაწილეობდნენ არსებულ პაკეტში. ასეთი საამქროების მოშორებაზე არის საუბარი. ეს იქნება პირველი ფილტრი. სელექტიური კონტრაქტირება აპრობირებული მეთოდია მთელ მსოფლიოში.
ეს ცვლილებები „ქართული ოცნების“ მიერ წინასაარჩევნოდ იყო დაანონსებული. ბოლო ოთხი წლის განმავლობაში დაიხარჯა მილიარდ ნახევარი ლარი და ორ მილიარდზე მეტი შემთხევვა დაფინანსდა. დაახლოებით მილიონ 600 ათასმა ადამიანმა მოიხმარა საყოველთაო ჯანდაცვა. ამით ასი ათასობით ადამიანი გადარჩა სიღარიბეს, ქონებრივი მდგომარეობის გაუარესებას. ასი ათასობით ფიზიკურად გადარჩა სიკვდილს თუ უნარშეზღუდულობას. დრო დადგა რეფორმაში შეტანილი იქნას ცვლილებები. საწყის ეტაპზე პრიორიტეტი იყო, რომ მოხსნილიყო ბარიერი. მოსახლეობის ნახევარს ხელი არ მიუწვდებოდა გადაუდებელ ჯანმრთელობის მომსახურებასთან,“-განაცხადა აკაკი ზოიძემ.
მანანა ღოღობერიძე
