საქართველოს განათლების სამინისტროს აუდიტის სამსახურმა, ადიგენში, მოხის სკოლაში მომხდარი, სავარაუდო დისკრიმინაციის ფაქტის შესწავლა მას შემდეგ დაიწყო რაც, მოსწავლეებმა აღნიშნულ უწყებას ოფიციალური წერილით მიმართეს.
საუბარია, რამდენიმე ხნის წინ მოხის სკოლაში მომხდარ ფაქტზე, როდესაც ერთ-ერთმა სკოლის მოსწავლემ, თეონა ბერიძემ განაცხადა, რომ დირექტორმა ნათია რეხვიაშვილმა, სკოლაში მირების წინაპირობად თავსაფრის მოხდა მოსთხოვა. გოგონამ ერთი სემესტრი ბათუმში, №27 საჯარო სკოლაში ისწავლა და მობილობით მოხის სკოლაში ბრუნდებოდა.
„რაც მე გადამხდა, ვფიქრობ, რომ ეს მუსლიმი ბავშვების შეურაცხოფა და დისკრიმინაციაა. მსგავსი ფაქტი რომ არ განმეორდეს, მოვითხოვთ განათლების სამინისტრომ რეაგირება მოახდინოს“, – ამბობს თეონა ბერიძე.
აღნიშნული ფაქტი გააპროტესტეს თეონას თანაკლასელებმა. მისდამი სოლიდარობისა და დირექტორის ქმედებისადმი პროტესტის ნიშნად, გაკვეთილზე მეთორმეტეკლასელი სხვა მუსლიმი გოგონებიც თავსაბურავებით გამოცხადდნენ.
ამის შემდეგ კი მოსწავლეებმა სკოლის ეზოში საპროტესტო აქციები გამართეს იმ მოთხოვნით, რომ სკოლის დირექტორი ნათია რეხვიაშვილი გაეთავისუფლებინათ. აქციებიდან მესამე დღეს სკოლაში პრეზიდენტის მრჩეველი და განათლების სამინისტროს წარმომადგენლები მივიდნენ. სამინისტროს თანამშრომლებმა მოსწავლეებს პირობა მისცეს, რომ მომხდარს შეისწავლიან, თუმცა აქვე სთხოვეს, რომ ამასთან დაკავშირებით წერილობით მიემართათ. ამ პირობის შემდეგ მოსწალვეები გაკვეთილებზე დაბრუდნენ;
უფლებადამცველი არასამთავრობოები ფიქრობენ, რომ მოხის სკოლის დირექტორის მოთხოვნა დისკრიმინაციულია. საკითხით დაინტერსედნენ და შესწავლა დაიწყეს, რელიგიურ უმცირესობების საკითხებზე მომუშავე არასამთავრობო ორგანიზაციებმა, სახალხო დამცველის აპარატმა და საქართველოს პრეზიდენტის ადმინისტრაციამ. მომხდარს სხვა არასამთავრობო ორგანიზაციებთან ერთად, ტოლერანტობისა და მრავალფეროვნების ინსტიტუტი (TDI) სწვალობის, რომელთა წარმომადგენელმა თამთა მიქელაძემ შეიტანა მუსლიმი მოსწავლეების წერილი განთლების სამინისტროში.
მომხდართან დაკავშირებით განსხვავებული პოზიცია აქვთ მოხეში მცხოვრებ მართლმადიდებლებს. ისინი მუსულიმი მოსწავლეების პროტესტს პროვოკაციას უწოდებენ.
დირექტორი ბრალდებებს „ცრუს“ და „აგორებულ ჭორს“ უწოდებს. „არაფერი მსგავსი არ მომხდარა. ეს ბავშვი იმაზე ადრე ჩაირიცხა სკოლაში, ვიდრე ეს ამბავი ატყდებოდა. დოკუმენტი ოფიციალურად არსებობს. ვერ გეტყვით, ეს ამბავი რატომ ატყდა. სხვა ვერაფერს გეტყვით. მსგავსი საუბარი ამ ბავშვთან არ მქონია. რა თქმა უნდა, პირადად შევხვდი მას, მაგრამ თავსაფარზე მსგავსი საუბარი არ ყოფილა. თუ დაიჯერებთ ასეა. ეს ბავშვი ჩაირიცხა 22 დეკემბერს, დილის 9 საათსა და 45 წუთზე. ეს ბავშვი სკოლაში დადიოდა, მე მოთხოვნა გაგზავნილი მქონდა, სკოლის დასტურს ველოდებოდი, რომელიც 21-ში მომივიდა. გუშინ ეს ბავშვი უკვე ჩარიცხული იყო და ამბავი ატყდა დაახლოებით 3 საათზე. მე მსგავსი რამ არ მითქვამს. ჩვენ ვისაუბრეთ და ის ამბობს, რომ მე მსგავსი რამ არ მითქვამს. რა ხდება, არ ვიცი” – აღნიშნა ნათია რეხვიაშვილმა „ლიბერალთან” საუბრისას.
საკუთარი პოზიცია არაერთხელ დააფიქსირა ქართველ მუსლიმთა კავშირის თავმჯდომარე ტარიელ ნაკაიძემ. იგი იმედოვნებს, რომ რელიგიური მოტივით მომხდარი სხვა დისკრიმინაციული ქმედბების მსგავსად, არ მოხდება ამ შემთხვევის დავიწყება სათანადო რეაგირების გარეშე.
„პრობლემა უფრო ღრმა და კომპლექსურია ვიდრე სკოლის მოსწავლეების გაფიცვა ან სოფელ მოხის საჯარო სკოლის დირექტორის სავარაუდო დისკრიმინაციის ფაქტის გამოვლენა. ვფიქრობთ რეგიონში ხელისუფლების არაეფექტურმა პოლიტიკამ, რომელიც კონკრეტულად მუსლიმებისა და ქრისტიანების შორის დაპირისპირების გაღვივებას ემსახურება, ხელი შეუწყო კონფლიქტების წახალისებას და ყველასთვის ნათელი ხდება, რომ მოხეში სიტუაცია უკიდურესად იძაბება. იმედს ვიტოვებთ განათლებისა და მცნიერების სამინისტრო დაინტერესდება დირექტორის კომპეტენტურობით და რელიგიური მოტივით მომხდარი სხვა დისკრიმინაციული ქმედბების მსგავსად, არ მოხდება ამ შემთხვევის დავიწყება სათანადო რეაგირების გარეშე. ვფიქრობთ რეგიონში პრობლემების მოგვარებისათვის აუცილებელია განთავისუფლდეს მოხის საჯარო სკოლის დირექტორი თანამდებობიდან“,- აღნიშნა ტარიელ ნაკაიძემ.
განათლების სამინისტროს აუდიტის სამსახურის წარმომადგენლები სკოლის დირექტორს, პედაგოგებსა და მის თანაკლასელს თეონა ბერიძეს ერთდროულად შეხვდნენ, თუმცა უცნობია კონკრეტულად რა საკითხებით დაინტერესდნენ ისინი.
წყარო: sknews.ge
სოფიკო ნინიკაშვილი
